விவசாயிகளுக்கு வேளாண் கருவிகள்

கோபி அருகே கடுக்காம்பாளையம் கிராமத்தில் விவசாயிகளுக்கு வேளாண் கருவிகள் வழங்கும் நிகழ்ச்சி செவ்வாய்க்கிழமை நடைபெற்றது.
 கடுக்காம்பாளையம் சுற்று வட்டாரப் பகுதிகளில் உள்ள விவசாயிகள் ஒன்றிணைந்து ஏர்முனை உழவர் உற்பத்தியாளர் என்ற நிறுவனத்தைத் துவங்கியுள்ளனர். இந்தக் குழுக்களுக்கு விவசாய இயந்திரங்கள் வழங்கும் விழா வேளாண்மை இணை இயக்குநர் குணசேகரன் தலைமையில், கடுக்காம்பாளையத்தில் நடைபெற்றது.
 இதைத் தொடர்ந்து, கூட்டுப் பண்ணையத் திட்டத்தின்கீழ் 100 விவசாயிகளைக் கொண்ட இரண்டு குழுக்களுக்கு ரூ. 10 லட்சம் மதிப்பிலான விவசாய இயந்திரக் கருவிகளை இணை இயக்குநர் வ.குணசேகரன் வழங்கினார். 
நடப்பு ஆண்டில் கூட்டுப் பண்ணையத் திட்டத்தின்கீழ், ஈரோடு மாவட்டத்தில் உள்ள 14 ஊராட்சி ஒன்றியங்களிலும், உழவர் குழுக்கள் தொடங்கப்பட்டு ரூ. 2.2 கோடி மதிப்பீட்டில் முழு மானியத்தில் பண்ணைக் கருவிகள் வழங்கப்படவுள்ளதாகத் தெரிவித்தார்.
 இந்நிகழ்ச்சியில், துணை இயக்குநர் பெரியசாமி, மாவட்ட உழவர் விவாதக் குழு செயலாளர் வெங்கடாசலபதி, மஞ்சள் விவசாயிகள் சங்கத் தலைவர் நஞ்சப்பன், கோவை தமிழ்நாடு வேளாண்மை பல்கலைக்கழக இறுதி ஆண்டு மாணவிகள், பல்வேறு கிராமங்களைச் சேர்ந்த 200 க்கும் மேற்பட்ட விவசாயிகள் பங்கேற்றனர்.