மதுரை-நத்தம் 4 வழிச்சாலை பணிகளுக்கு தடை கோரிய மனு தள்ளுபடி

மதுரை-நத்தம் நான்கு வழிச்சாலை அமைக்கும் பணிகளுக்கு நிலங்கள் கையகப்படுத்த தடை கோரி தாக்கல் செய்யப்பட்ட மனுவை தள்ளுபடி செய்து, சென்னை உயர்நீதிமன்ற மதுரைக் கிளை திங்கள்கிழமை உத்தரவிட்டது.
மதுரை-நத்தம் இடையே நான்கு வழிச்சாலை அமைக்கும் பணிகள் கடந்த 2 மாதங்களுக்கு முன்பு தொடங்கியது. இதற்காக மதுரை-நத்தம் இடையே உள்ள பல்வேறு நீர்நிலைகள் கையகப்படுத்தப்பட்டு, சாலை அமைக்கப்பட உள்ளது. 
இதனால் பல்வேறு கிராமங்கள் பாதிக்கப்படும். எனவே, நீர்நிலைகளை கையகப்படுத்துவதை விட்டுவிட்டு, மாற்று வழியில் சாலையை அமைக்க உத்தரவிட வேண்டும் என்று முத்தையா என்பவர் சென்னை உயர்நீதிமன்ற மதுரைக் கிளையில் வழக்குத் தொடர்ந்திருந்தார்.
இந்த வழக்கு ஏற்கெனவே விசாரணைக்கு வந்தபோது நெடுஞ்சாலைத்துறையினர் பதிலளித்திருந்தனர். இந்நிலையில், இந்த வழக்கு நீதிபதிகள் எம்.எம்.சுந்தரேஷ், என்.சதீஷ்குமார் ஆகியோர் 
முன்பு திங்கள்கிழமை விசாரணைக்கு வந்தது. முடிவில், மனுதாரர் தன்னுடைய குற்றச்சாட்டுகளுக்கு போதுமான ஆவணங்களை தாக்கல் செய்யவில்லை. மேலும் தற்போதைய திட்டத்தில் இருந்து மாற்று திட்டம் தயாரிப்பதற்கு கூடுதல் நிலம் கையகப்படுத்த வேண்டியது வரும் என்று தேசிய நெடுஞ்சாலைத்துறை சார்பில் தெரிவிக்கப்பட்டுள்ளது எனக் கூறி மனுவைத் தள்ளுபடி செய்து உத்தரவிட்டனர்.