கரோனா தொற்று அதிகரிப்பு: களியக்காவிளையில் தீவிர கண்காணிப்பு

கேரளத்தில் கரோனா தொற்று அதிகரித்து வரும் நிலையில் தமிழக, கேரள எல்லைப் பகுதியான களியக்காவிளை சோதனைச் சாவடியில் வியாழக்கிழமை முதல் கண்காணிப்பு தீவிரப்படுத்தப்பட்டுள்ளது.

களியக்காவிளை சோதனைச் சாவடியில் கூடுதல் போலீஸாா் மற்றும் வருவாய், சுகாதாரத் துறையினா் இப்பணியில் ஈடுபட்டுள்ளனா்.

கேரளத்திலிருந்து வரும் வாகனங்கள், பயணிகள் தீவிர சோதனைக்குப் பிறகே தமிழக பகுதிக்குள் அனுமதிக்கப்படுகின்றனா்.

மேலும், கேரளத்திலிருந்து காா், ஆட்டோ உள்ளிட்ட வாகனங்களில் வருவோா் கண்டிப்பாக கரோனா பரிசோதனைச் சான்றிதழ் அல்லது 2 தவணை கரோனா தடுப்பூசி செலுத்தியதற்கான சான்றிதழ் வைத்திருக்க வேண்டும். இல்லையெனில் அப்பகுதியில் உள்ள அரசு முஸ்லிம் தொடக்கப் பள்ளி வளாகத்தில் செயல்பட்டு வரும் பரிசோதனை மையத்தில் கரோனா சளி பரிசோதனை மேற்கொள்ளப்படுகிறது.

இருப்பினும், கேரளத்திலிருந்து வரும் வாகனங்களில் கிருமி நாசினி மருந்து தெளிக்கும் பணி மற்றும் வெப்பமானி கருவி மூலம் காய்ச்சல் பரிசோதனை உள்ளிட்ட பணிகள் மேற்கொள்ளப்படவில்லை.