காவலர் பணிக்குத் தேர்வான 205 பேருக்கு பயிற்சி தொடக்கம்

காவலர் பணிக்குத் தேர்வான 205 பேருக்கு தஞ்சாவூர் ஆயுதப்படை மைதானத்தில் 7 மாத கால அடிப்படைப் பயிற்சி புதன்கிழமை தொடங்கியது.
தமிழ்நாடு சீருடை பணியாளர்கள் தேர்வுக் குழுமம் சார்பில் இரண்டாம் நிலை காவலர் தேர்வுக்கான எழுத்துத் தேர்வு 2017, மே 21-ம் தேதி தமிழகம் முழுவதும் அனைத்து மாவட்டங்களிலும் நடைபெற்றது.
இதேபோல, தஞ்சாவூர் மாவட்டத்தில் 12 மையங்களில் நடைபெற்ற எழுத்துத் தேர்வில் 10,000-க்கும் அதிகமானோர் எழுதினர். இதில், தேர்வு செய்யப்பட்டவர்களுக்கு ஜூலை 27-ம் தேதி முதல் ஆக. 1-ம் தேதி வரை உடற் திறன் தேர்வும், மருத்துவப் பரிசோதனையும் நடத்தப்பட்டது. இதன் மூலம் 205 பேர் தேர்ச்சி பெற்றனர். இவர்களுக்கு 7 மாத கால காவலர் அடிப்படை பயிற்சி தஞ்சாவூர் ஆயுதப் படை மைதானத்தில் புதன்கிழமை தொடங்கியது. இதை தொடங்கி வைத்த மாவட்டக் காவல் கண்காணிப்பாளர் டி. செந்தில்குமார் அறிவுரை வழங்கினார்.