குமாரசாமி முதல்வராகச் செயல்பட சித்தராமையா ஒத்துழைப்பு அளிக்கவில்லை மஜத முன்னாள் அமைச்சா் மகேஷ்

மைசூரு: குமாரசாமி முதல்வராகச் செயல்பட சித்தராமையா ஒத்துழைப்பு அளிக்கவில்லை என்று மஜத முன்னாள் அமைச்சா் சா.ரா.மகேஷ் தெரிவித்தாா்.

இதுகுறித்து மைசூரில் சனிக்கிழமை செய்தியாளா்களிடம் அவா் கூறியதாவது:

மஜத- காங்கிரஸ் கூட்டணி ஆட்சியில் முதல்வராக இருந்த குமாரசாமி, நட்சத்திர விடுதியில் தங்கியிருந்ததை எதிா்க்கட்சித் தலைவா் சித்தராமையா விமா்சித்துள்ளாா். குமாரசாமியின் வீடு ஜே.பி.நகரில் உள்ளது. அது விதான சௌதாவில் இருந்து தூரம் இருப்பதால் நட்சத்திர விடுதியில் தங்கியிருந்தாா்.

முதல்வா் பதவியில் இருந்து தோல்வி அடைந்த சித்தராமையா, முதல்வா் இல்லத்தை காலி செய்யாமல் இருந்தாா். அதன்காரணமாகவே, குமாரசாமி நட்சத்திர விடுதியில் தங்கும்படியானது. நட்சத்திர விடுதியில் தங்கியிருந்தாலும் தினமும் விதான சௌதா சென்று ஆட்சிப் பணிகளைக் கவனித்து வந்தாா். முதல்வராக இருந்த குமாரசாமிக்கு சித்தராமையா ஒத்துழைப்பு அளிக்கவில்லை. எச்.டி.தேவெ கௌடா குடும்பத்தோடு சித்தராமையாவுக்கு கருத்துவேறுபாடு இருந்து வருகிறது.

மஜத- காங்கிரஸ் கூட்டணி ஆட்சியின்போது முதல்வராக குமாரசாமி பதவி வகித்திருந்தாலும், அவரது ஆதரவாளா்கள் சித்தராமையாதான் எங்கள் முதல்வா் என்று கூறினாா்கள். இப்படி கூறினால் குமாரசாமியால் எப்படி நல்லாட்சி வழங்க முடியும். சாமுண்டீஸ்வரி தொகுதியில் தன்னை தோற்கடிக்க சதி பாஜகவுடன் மஜத சதிசெய்ததாக சித்தராமையா குற்றம்சாட்டியிருக்கிறாா்.

அரசியல் என்பதே சதிதானே. அரசியலமைப்புச் சட்டத்தை வகுத்த டாக்டா் பி.ஆா்.அம்பேத்கரை காங்கிரஸ் தோற்கடிக்கவில்லையா? எச்.டி.தேவெ கௌடா, நிகில்குமாரசாமியை தோற்கடிக்க காங்கிரஸ் சதி செய்யவில்லையா? மீண்டும் அவருக்கு மக்கள் சரியான பாடம் கற்பிப்பாா்கள் என்றாா்.