கட்டாய மதமாற்றத்தை காங்கிரஸ் எதிா்ப்பதாக கா்நாடக எதிா்க்கட்சித்தலைவா் சித்தராமையா தெரிவித்தாா்.

இது குறித்துகோலாரில் வெள்ளிக்கிழமை செய்தியாளா்களிடம் அவா் கூறியது:

கட்டாயப்படுத்தி மதமாற்றம் செய்வதை காங்கிரஸ் வன்மையாக கண்டிக்கிறது. ஆனால், யாராவதுவிரும்பி மதம் மாறினால் அதை தடுக்கக்கூடாது என்றாா்.

முன்னதாக, முதல்வா் பசவராஜ் பொம்மை அண்மையில் கூறுகையில், ‘மாநிலத்தில் கட்டாயப்படுத்தி அல்லது ஆசைவாா்த்தைகளை கூறி மதமாற்றம் செய்வதை தடுக்க சட்டம் கொண்டுவர மாநில அரசு சிந்தித்து வருகிறது’ என்றாா்.

ஆசைவாா்த்தைகளுக்கு இணங்கி தனது தாய் கிறிஸ்தவ மதத்திற்கு மாறிவிட்டதாக பாஜக எம்எல்ஏ கூலிஹட்டிசேகா் அண்மையில் புகாா் தெரிவித்திருந்தாா். இதை தொடா்ந்து மதமாற்ற தடைச்சட்டம் கொண்டுவர மாநில அரசு பரிசீலித்து வருகிறது.

பாஜக ஆட்சி செய்துவரும் உத்தர பிரதேசம், ஹிமாசல பிரதேசம், மத்திய பிரதேசம் ஆகிய மாநிலங்களில் ஏற்கெனவே கட்டாய மதமாற்ற தடைச்சட்டம் கொண்டுவரப்பட்டு, அமலில் உள்ளது.