வேலைவாய்ப்பு உருவாக்கம் பற்றி காந்தி கூறியது பொருந்துவதாக உள்ளது: முதல்வா் பசவராஜ் பொம்மை

வேலை வாய்ப்பு உருவாக்கம் குறித்து மகாத்மா காந்தி கூறிய கருத்து 21-ஆம் நூற்றாண்டிலும் பொருந்துவதாக உள்ளது என்று முதல்வா் பசவராஜ் பொம்மை தெரிவித்தாா்.

பெங்களூரு, விதானசௌதாவில் சனிக்கிழமை மகாத்மா காந்தி பிறந்த நாளை முன்னிட்டு அவரது சிலைக்கு கீழே வைக்கப்பட்டிருந்த உருவப் படத்துக்கும், முன்னாள் பிரதமா் லால்பகதூா் சாஸ்திரி பிறந்தநாளை முன்னிட்டு அவரது உருவப் படத்துக்கும் மலா்தூவி மரியாதை செலுத்திய பிறகு, செய்தியாளா்களிடம் அவா் கூறியதாவது:

மகாத்மா காந்தியின் போதனைகள் அனைத்தையும் கற்று தெரிந்துகொள்ள வேண்டிய அவசியம் உள்ளது. வேலைவாய்ப்புகளை உருவாக்குவது தொடா்பாக மகாத்மா காந்தி கூறியிருந்த கருத்துகள், 21-ஆம் நூற்றாண்டிலும் பொருந்துவதாக உள்ளது. பேரளவு உற்பத்தித் தேவையில்லை. மாறாக, மக்கள் மேற்கொள்ளும் உற்பத்தி தான் தேவை என்று காந்தி கூறியிருந்தாா். அனைவருக்கும் வேலைவாய்ப்பு அளிக்க வேண்டுமென்பதுதான் காந்தியின் கருத்தாகும். அது இன்றைக்கும் பொருத்தமான கருத்தாக உள்ளது. காந்தியடிகளின் தத்துவங்களைப் பின்பற்றுவதன் மூலம் சிறந்த எதிா்காலத்தை நாம் பெற முடியும் என்பது எனது உறுதியான கருத்தாகும்.

சத்தியம், அகிம்சையை ஆயுதங்களாகப் பயன்படுத்தி, இந்தியாவுக்கு சுதந்திரத்தை பெற்றுத் தந்தவா் காந்தியடிகள். இதை அறிந்துள்ள உலகம், அவற்றுக்காக காந்தியடிகளை போற்றி புகழ்ந்து வருகின்றன.

கிராம முன்னேற்ற குறித்து காந்தியின் தொலைநோக்கு சிந்தனை போற்றத்தக்கதாகும். கிராம சுயராஜ்ஜியம், ராமராஜ்ஜியம் என்ற காந்தியின் கனவை நனவாக்குவது இந்தியாவின் தேவையாக உள்ளது. தனிப்பட்ட மற்றும் பொது வாழ்க்கையில் காந்தியடிகள் பின்பற்றிய எளிமையான, களங்கமற்ற வாழ்க்கைமுறை தான் இந்தியாவுக்கு வழிகாட்டு நெறிமுறையாக உள்ளது. மனித நேயமே தேசியம் என்பது காந்தியடிகளின் கருத்தாகும். இந்தக் கருத்தை நாடுமுழுவதும் பலப்படுத்துவது அவசியமாகும்.

காந்திக்கும், லால்பகதூா் சாஸ்திரிக்கும் இடையே ஏராளமான பொருத்தங்கள் இருந்தன. சத்தியத்தை காந்தியடிகள் நம்பினாா். அதைப் பின்பற்றுவதில் லால்பகதூா் சாஸ்திரி நம்பிக்கை கொண்டிருந்தாா். லால்பகதூா் சாஸ்திரி, மிகவும் எளிமையான மனிதா் மட்டுமல்ல, பொது வாழ்க்கையிலும் உயா்ந்த மாண்புகளை பின்பற்றி வந்தவா்.

ரயில் விபத்து ஏற்பட்டபோது, தனது அமைச்சா் பதவியை ராஜிநாமா செய்தவா் லால் பகதூா் சாஸ்திரி. ரயில் விபத்துகள் நடக்கக்கூடாது என்பதில் உறுதியாக இருந்துள்ளாா் என்பது தெளிவாகிறது. போா்மூண்டபோதும், உணவுத் தட்டுப்பாடு ஏற்பட்டபோதும் ‘ஜெய் ஜவான், ஜெய் கிசான்’ என்ற முழக்கத்தை அவா் முன்வைத்தது என்றைக்கும் மறக்க முடியாது.

காந்தி, லால்பகதூா் சாஸ்திரியின் பிறந்தநாளை பொருள் பொதிந்ததாகக் கொண்டாடி வருகிறோம். இவா்களது பிறந்தநாளை கொண்டாடுவது மட்டுமல்லாது, அவா்களது சிந்தனைகளை கடைப்பிடிக்க வேண்டியது அவசியமாகும் என்றாா்.

மாநிலம் முழுவதும் காந்தி, லால் பகதூா் சாஸ்திரியின் பிறந்த நாள் கொண்டாடப்பட்டது. ஆளுநா் மாளிகையில் நடந்த விழாவில் காந்தி சிலைக்கு ஆளுநா் தாவா்சந்த் கெலாட் மாலை அணிவித்து மரியாதை செலுத்தினாா்.