காவிரி தொடா்பாக முழு அடைப்புப் போராட்டத்திற்கு அவசியமில்லை என்று கா்நாடக துணை முதல்வா் டி.கே.சிவகுமாா் தெரிவித்தாா்.

இது குறித்து பெங்களூரில் வெள்ளிக்கிழமை செய்தியாளா்களிடம் அவா் கூறியது:

மாநிலத்தின் நலனை கா்நாடக அரசு காப்பாற்றி வரும்போது, காவிரி தொடா்பாக முழு அடைப்புப் போராட்டத்திற்கு அவசியமில்லை. எனினும், கா்நாடகம் தழுவிய முழு அடைப்புப் போராட்டத்திற்கு ஒரு சில அமைப்புகள் அழைப்பு விடுத்துள்ளன. முழு அடைப்புப் போராட்டத்தின்போது மக்களின் பாதுகாப்பை உறுதி செய்திருக்கிறோம். மாநிலத்தில் போராட்டத்தின்போது அமைதி நிலவியது. பெரும்பாலான பகுதிகளில் வழக்கம் போல வாகனங்கள் இயக்கப்பட்டன, கடைகள் திறக்கப்பட்டிருந்தன என்றாா்.

முதல்வா் சித்தராமையா கூறுகையில், ‘காவிரி தொடா்பாக போராட்டம் நடத்துவதை அரசு தடுக்கவில்லை. போராட்டம் நடத்துவதற்கு தடையில்லை. ஆனால், முழு அடைப்புப் போராட்டம் நடத்த வேண்டாம் என்று கேட்டுக்கொண்டிருந்தோம். முழு அடைப்புப்போராட்டம் நடத்துவதற்கு உச்சநீதிமன்றம் தடை விதித்திருக்கிறது. அதன்காரணமாகவே, முழு அடைப்பு வேண்டாம் என்று கூறியிருந்தோம். ஆனால், ஒருசில அமைப்புகள் முழு அடைப்புக்கு அழைப்பு விடுத்துள்ளன. ஆனால், ஊா்வலம், பேரணி, ஆா்ப்பாட்டத்திற்கு அனுமதிக்கவில்லை’ என்றாா்.