காஞ்சிபுரம் டிஎஸ்பிக்கு எதிராக கைது உத்தரவு பிறப்பித்த மாவட்ட நீதிபதி செம்மல்லை பணியிடை நீக்கம் செய்து சென்னை உயா்நீதிமன்ற தலைமைப் பதிவாளா் உத்தரவிட்டாா்.

வன்கொடுமைத் தடுப்புச் சட்டத்தின் கீழ் பதிவான வழக்கில் நடவடிக்கை எடுக்கவில்லை எனக் கூறி, காஞ்சிபுரம் துணைக் காவல் கண்காணிப்பாளா் சங்கா் கணேஷை கைது செய்து சிறையில் அடைக்க, காஞ்சிபுரம் மாவட்ட முதன்மை அமா்வு நீதிமன்ற நீதிபதி செம்மல் உத்தரவு பிறப்பித்தாா். மாவட்ட நீதிபதிக்கும் அவரது பாதுகாப்பு காவலரான லோகேஸ்வரன் இடையிலான தனிப்பட்ட பிரச்னை காரணமாக, நீதிபதி செம்மல் டிஎஸ்பியை கைது செய்ய உத்தரவிட்டதாகக் குற்றச்சாட்டு எழுந்தது.

இதுதொடா்பான வழக்கை விசாரித்த சென்னை உயா்நீதிமன்றம், டிஎஸ்பிக்கு எதிராக காஞ்சிபுரம் மாவட்ட நீதிபதி செம்மல் பிறப்பித்த உத்தரவை ரத்து செய்தது. மேலும் நீதிபதி சுமத்தப்படும் குற்றச்சாட்டு குறித்து உயா்நீதிமன்ற கண்காணிப்பு பதிவாளா் விசாரணை நடத்தவும், அந்த அறிக்கையை உயா்நீதிமன்ற நீதிபதிகள் குழுவுக்கு அனுப்பி வைக்கவும் உத்தரவிட்டது. இந்த உத்தரவை எதிா்த்து நீதிபதி செம்மல் தாக்கல் செய்த மனுவை உச்சநீதிமன்றம் தள்ளுபடி செய்தது.

இந்த நிலையில், உயா்நீதிமன்ற கண்காணிப்பு பதிவாளரின் விசாரணை அறிக்கையை உயா்நீதிமன்ற ஒழுங்கு நடவடிக்கை குழு நீதிபதிகள் பரிசீலனை செய்தனா். பின்னா், நீதிபதி செம்மல்லை பணியிடை நீக்கம் செய்ய உத்தரவிட்டனா். அதன்படி, நீதிபதி செம்மல்லை பணியிடை நீக்கம் செய்து உயா்நீதிமன்ற தலைமைப் பதிவாளா் எஸ்.அல்லி உத்தரவிட்டாா்.