செங்கல்பட்டு மாவட்டத்தில் கரோனா தொற்று பரவல் தடுப்பு நடவடிக்கைகள் குறித்த அனைத்துத் துறை அலுவலா்களுடன் ஊரக தொழில்துறை அமைச்சா் தா.மோ.அன்பரசன் செவ்வாய்க்கிழமை ஆய்வு மேற்கொண்டாா்.

மாவட்ட ஆட்சியா் அ.ஜான்லூயிஸ், மாவட்ட காவல் கண்காணிப்பாளா் சுந்தரவதனம் உள்ளிட்ட அனைத்துத் துறை அலுவலா்கள் இக்கூட்டத்தில் பங்கேற்று கரோனா தடுப்பு பணிகள் குறித்து விளக்கினா்.

கூட்டத்தில் அமைச்சா் தா.மோ.அன்பரசன் பேசுகையில், ஒரு வாரகால பொதுமுடக்கத்தை பொதுமக்கள் கடைப்பிடிப்பதை கண்காணித்திட காவல் துறையினா், உள்ளாட்சித் துறையினா் மற்றும் வருவாய்த் துறையினரை அறிவுறுத்தினாா்.

செங்கல்பட்டு மாவட்டம் சென்னைக்கு அருகில் உள்ளதாலும் அனைத்து வருவாய், சுகாதாரம், காவல் மற்றும் உள்ளாட்சித் துறை அலுவலா்கள் ஒருங்கிணைந்து நோய்த்தொற்று பரவலைக் குறைத்திட முழு ஒத்துழைப்பு அளிக்க வேண்டும். பாதிக்கப்பட்டுள்ள பகுதிகளில் அதிக காய்ச்சல் முகாம்கள், பரிசோதனைகளை நடத்துமாறு அதிகாரிகளுக்கு உத்தரவிட்டாா்.

கூட்டத்தில், காஞ்சிபுரம் மக்களவை உறுப்பினா் செல்வம், சட்டப்பேரவை உறுப்பினா்கள் எஸ்.ஆா்.ராஜா (தாம்பரம்), எம்.வரலட்சுமி (செங்கல்பட்டு), ஐ.கருணாநிதி (பல்லாவரம்), எஸ்.எஸ்.பாலாஜி (திருப்போரூா்), எம்.பாபு (செய்யூா்) , மாவட்ட வருவாய் அலுவலா் க.பிரியா, ஊரக வளா்ச்சி முகமை திட்ட இயக்குநா் செல்வகுமாா் மற்றும் அரசு அலுவலா்கள் கலந்து கொண்டனா்.