நான்காவது உலகத் தமிழர் பொருளாதார மாநாடு தென்னாப்பிரிக்காவின் டர்பன் நகரில் வரும் நவ.16-இல் தொடங்குகிறது. 
இதுகுறித்து நீதிபதி வள்ளிநாயகம், உலகத் தமிழர் பொருளாதார மையத் தலைவர் வி.ஆர்.எஸ்.சம்பத், தொழிலதிபர்கள் வி.ஜி.சந்தோஷம், ஏ.அபுபக்கர் ஆகியோர் வெள்ளிக்கிழமை சென்னை செய்தியாளர்களிடம் கூறியது:
டர்பன் நகரில் சுமார் 10 லட்சம் தமிழர்கள் வசிப்பதால் அந்த இடத்தில் இதுபோன்ற மாநாடு நடைபெறுவது சிறப்புக்குரியதாக இருக்கும். இம்மாநாடு உலகெங்கும் உள்ள தமிழர்களின் வணிகம், பொருளாதாரம் குறித்து விவாதிக்கவும், முதலீட்டுக்கான வாய்ப்புகள், தொழில்முறை ஒருங்கிணைப்பு, அறிவுத்திறன்களைப் பகிர்தல் போன்றவை குறித்து கலந்துரையாடுவதற்கும் ஒரு களமாக அமையும். 
யார்-யார் பங்கேற்பு? இந்தியக் குடியரசுத் துணைத் தலைவர் வெங்கய்ய நாயுடு, கயானா பிரதமர் வீராசாமி நாகமுத்து, மோரீஷஸ் குடியரசுத் துணைத் தலைவர் பரமசிவம் பிள்ளை வையாபுரி, மலேசிய அமைச்சர் டத்தோ சரவணன், புதுச்சேரி முதல்வர் நாராயணசாமி உள்ளிட்டோர் பங்கேற்கவுள்ளனர். மத்திய அமைச்சர்கள் சுரேஷ் பிரபு, பிரகாஷ் ஜாவடேகர், தமிழக அமைச்சர்கள் எம்.சி.சம்பத், கே.பாண்டியராஜன், தொழிலதிபர்கள் நல்லிகுப்புசாமி, ஜெம் வீரமணி, வி.ஜி.பி. சந்தோஷம், பழனி ஜி.பெரியசாமி உள்ளிட்டோரும் கல்வியாளர்கள் ஜி.விசுவநாதன், எஸ்.ஜெகத்ரட்சகன், நீதிபதி ஏ.ஆர்.லட்சுமணன், மூத்த வழக்குரைஞர்கள் ஆர்.காந்தி, மோகன் பராசுரன் ஆகியோரும் பங்கேற்கின்றனர். 
சென்னை வளர்ச்சிக் கழகம், உலகத் தமிழர் பொருளாதார மையம் மற்றும் தென்னாப்பிரிக்காவில் அமைக்கப்பட்டுள்ள விழாக்குழு ஆகிய மூன்றும் ஒன்றிணைந்து ஏற்பாடு செய்துள்ளன. இந்தியா, மலேசியா, துபை, லண்டன், ரஷியா நாடுகளிலிருந்து 500-க்கும் மேற்பட்ட பேராளர்கள் மாநாட்டில் பங்கேற்கப் பதிவு செய்துள்ளனர். இந்த மாநாட்டின் விவரங்களை ஜ்ஜ்ஜ்.ங்ஸ்ரீர்ய்ர்ம்ண்ஸ்ரீஸ்ரீர்ய்ச்ழ்ங்ய்ஸ்ரீங்.ண்ய் என்ற இணையதளத்தில் காணலாம்.