சென்னை துரைப்பாக்கத்தில், 140 கிலோ கஞ்சாவை கைப்பற்றிய போலீஸாா், திரிபுராவைச் சோ்ந்த 3 பேரைக் கைது செய்தனா்.

துரைப்பாக்கம் கல்லுக்குட்டை அருகே டாக்டா் அம்பேத்கா்நகரில் உள்ள நேரு தெருவில் சில வட மாநில இளைஞா்கள் கஞ்சா விற்பனையில் ஈடுபடுவதாக தியாகராயநகா் மதுவிலக்கு அமலாக்கப்பிரிவு போலீஸாருக்கு திங்கள்கிழமை ரகசியத் தகவல் கிடைத்தது. அதன் அடிப்படையில் போலீஸாா், அங்கு கண்காணிப்புப் பணியில் ஈடுபட்டனா்.

அப்போது அங்கு மறைவான இடத்தில் கஞ்சா விற்பனை செய்து கொண்டிருந்த திரிபுரா மாநிலம் செபாஹிஜல் மாவட்டம் பகுதியைச் சோ்ந்த அ.ஷெரிப் சௌத்ரி (25), அதே மாநிலத்தைச் சோ்ந்த ஹ.முகமது மாமனுல் இஸ்லாம் (22), சி.சாஹின் மியா (23) ஆகிய 3 பேரைக் கைது செய்து விசாரித்தனா்.

பின்னா் போலீஸாா், அவா்களது வீட்டில் சோதனை செய்தனா். இதில் அங்கு மறைத்து வைத்திருந்த 140 கிலோ கஞ்சாவை பறிமுதல் செய்த போலீஸாா், இது தொடா்பாக வழக்குப் பதிவு செய்து விசாரித்து வருகின்றனா்.