ஆதிதிராவிடா் மற்றும் பழங்குடியினா் நல விடுதிகளை மறுசீரமைக்கத் தேவையான பரிந்துரைகளை வழங்க உயா்நிலைக் குழு அமைக்கப்பட்டுள்ளது. இதற்கான உத்தரவை ஆதிதிராவிடா் மற்றும் பழங்குடியினா் நலத் துறை வெளியிட்டுள்ளது.

இதுகுறித்து, துறையின் செயலா் க.லட்சுமி பிரியா வெளியிட்டுள்ள உத்தரவு விவரம்:

அனைத்து அரசு மாணவா் விடுதிகளின் செயல்பாடுகளையும் ஆய்வு செய்து, அதன் கட்டமைப்பு வசதிகள், சுகாதாரம், கல்விச் சூழல், உணவுத் தரம், பாதுகாப்பு, கண்காணிப்பு ஆகியவற்றை மறுசீரமைக்கத் தேவையான பரிந்துரைகளை வழங்க உயா்நிலைக் குழு அமைக்கப்படும் என பட்ஜெட் உரையில் தெரிவிக்கப்பட்டிருந்தது. இந்த அறிவிப்பைச் செயல்படுத்துவது தொடா்பாக, ஆதிதிராவிடா் நலத் துறை இயக்குநா் கடிதம் அனுப்பியிருந்தாா்.

அதில், ஆதிதிராவிடா் நல விடுதிகளின் செயல்பாடுகளை ஆய்வு செய்து, அதன் கட்டமைப்பு வசதிகள், சுகாதாரம், கல்விச்சூழல், உணவுத் தரம், பாதுகாப்பு, கண்காணிப்பு ஆகியவற்றை மறுசீரமைக்கத் தேவையான பரிந்துரைகளை வழங்க உயா்நிலைக் குழுக்களை அமைக்கக் கோரப்பட்டிருந்தது. அதன்படி, மாவட்ட, மாநில அளவிலான குழுக்கள் அமைக்கப்பட்டுள்ளன.

மாவட்ட அளவிலான குழு: மாவட்ட அளவிலான உயா்நிலை கண்காணிப்புக் குழுவில், மாவட்ட ஆட்சியா் தலைவராக இருப்பாா். மாவட்ட அளவிலான கண்காணிப்புக் குழுக் கூட்டமானது, ஆண்டுக்கு மூன்று முறை நடத்தப்படும். இந்தக் கூட்டத்தில் விவாதிக்கப்படும் அம்சங்கள், ஆதிதிராவிடா் நல இயக்குநரகத்துக்கு பரிந்துரைகளாக அனுப்பி வைக்கப்படும்.

மாநில அளவிலான குழு: மாநில அளவிலான குழுவில் 11 போ் இடம்பெற்றிருப்பா். இந்தக் குழுவின் தலைவராக தலைமைச் செயலா் இருப்பாா். இந்தக் குழுவானது, ஆண்டுக்கு இரண்டு முறை கூடி விவாதிக்கும். மாவட்ட அளவிலான குழு வழங்கியுள்ள பரிந்துரைகளை ஆய்வு செய்து, உரிய வழிகாட்டுதல்களை வழங்கும் என்று தனது உத்தரவில் ஆதிதிராவிடா் மற்றும் பழங்குடியினா் நலத் துறை செயலாளா் லட்சுமி பிரியா தெரிவித்துள்ளாா்.