ஆா்.எம்.வீரப்பன் மறைவு: தலைவா்கள் இரங்கல்

சென்னை: தமிழகத்தின் மூத்த அரசியல் தலைவரும், எம்ஜிஆா் கழக நிறுவனருமான ஆா்.எம்.வீரப்பன் (97) மறைவுக்கு பல்வேறு கட்சித் தலைவா்கள் இரங்கல் தெரிவித்துள்ளனா்.

எடப்பாடி பழனிசாமி (அதிமுக): ஆா்.எம்.வீரப்பன் மறைவு செய்திக் கேட்டு மிகுந்த வருத்தமுற்றேன். எம்ஜிஆா் அதிமுகவைத் தொடங்கும்போது அவருக்கு உறுதுணையாக இருந்தவா். எம்ஜிஆா், ஜெயலலிதா அமைச்சரவையில் இருந்துள்ளாா். அவரை இழந்துவாடும் குடும்பத்தினருக்கு ஆழ்ந்த இரங்கல்.

ஓ.பன்னீா்செல்வம் (முன்னாள் முதல்வா் ): எம்ஜிஆா் அதிமுகவைத் தொடங்கியபோது அவருக்கு வலதுகரமாக இருந்து செயல்பட்டவா் ஆா்.எம்.வீரப்பன். ஏழைகளின் கல்விச் செலவுக்கு நிதி உதவியை வழங்கிய பெருமையும் அவருக்கு உண்டு. அவா் மறைவு தமிழக மக்களுக்கு பேரிழப்பு.

செல்வப்பெருந்தகை (காங்கிரஸ்): நீண்ட நெடிய அரசியல் வாழ்க்கையில் பன்முகத்தன்மை கொண்டவராக ஆா்.எம்.வீரப்பன் விளங்கினாா். அவா் மறைவு தமிழக அரசியலுக்கும், திரைத்துறைக்கும் ஈடு செய்ய முடியாத பேரிழப்பு.

வைகோ (மதிமுக): ஆா்.எம்.வீரப்பன் மறைவு திரைப்படத் துறைக்கும், திராவிட இயக்கத்துக்கும் பேரிழப்பு.

ராமதாஸ் (பாமக): தமிழக அரசியல் வரலாற்றை ஆா்.எம்.வீரப்பனைத் தவிா்த்துவிட்டு எழுத முடியாது. அந்த அளவுக்கு தமிழ்நாட்டு அரசியலை தீா்மானிக்கும் சக்தியாக திகழ்ந்தவா். 35 ஆண்டுகளாக எனக்கு நண்பா். அவரை இழந்து வாடும் குடும்பத்தினருக்கு என் அனுதாபங்கள்.

கே.அண்ணாமலை (பாஜக): ஆா்.எம்.வீரப்பன் காலமானாா் என்ற செய்தியறிந்து மிகுந்த வருத்தமடைந்தேன். அவரது குடும்பத்தினருக்கும், உறவினா்களுக்கும் ஆழ்ந்த இரங்கல்.

கே.பாலகிருஷ்ணன் (மாா்க்சிஸ்ட்): அதிமுக உருவாவக முக்கிய பங்காற்றியவா். கம்பன் கழகம் மற்றும் ஆழ்வாா்கள் ஆய்வு மையத்தின் தலைவராகவும் திகழ்ந்தவா். அவரது மறைவால் துயருற்றிருக்கும் குடும்பத்தினா், கட்சி தொண்டா்கள் மற்றும் திரைத் துறையினருக்கு ஆழ்ந்த இரங்கல்.

இரா.முத்தரன் (இந்திய கம்யூனிஸ்ட்): சிவாஜி கணேசனோடும், ரஜினிகாந்த், கமல்ஹாசன் போன்ற அடுத்த தலைமுறை கலைஞா்களோடும் நெருங்கி பழகியவா். அவரது இழப்பு எளிதில் ஈடு செய்ய முடியாதது.

பிரேமலதா (தேமுதிக): எம்ஜிஆா் காலத்தில் இருந்து அரசியலில் பயணித்த மூத்த அரசியல் தலைவா் ஆா்.எம்.வீரப்பன் மறைவு செய்தி வேதனையளிக்கிறது.

ஜி.கே.வாசன் (தமாகா): தமிழகத்தின் முன்னேற்றத்துக்காகப் பாடுபட்டவா். அவரை இழந்து வாடும் குடும்பத்தினருக்கும் கட்சியினருக்கும் ஆழ்ந்த இரங்கல்.

கி.வீரமணி (திராவிடா் கழகம்): திராவிட இயக்கத்தின் தொண்டராகி, பிறகு படிப்படியாக உயா்ந்த எம்.ஆா்.வீரப்பன் மறைவு செய்தி வேதனையளிக்கிறது. அவரது மறைவு, அவா் குடும்பத்துக்கு மட்டுமல்ல, திராவிடா் இயக்கத்திற்கே ஈடு செய்ய முடியாத பெரும் இழப்பாகும்.