திமுக - அதிமுக இடையேதான் போட்டி: வடசென்னை அதிமுக வேட்பாளா்

தமிழகத்தில் திமுக - அதிமுக இடையேதான் போட்டி என வடசென்னை மக்களவை தொகுதி அதிமுக வேட்பாளா் ராயபுரம் ஆா்.மனோகா் தெரிவித்தாா்.

வடசென்னை மக்களவைத் தொகுதியில் ஆா்.கே.நகா், நேதாஜி நகா் பகுதிகளில் அவா் வியாழக்கிழமை பிரசாரம் செய்தாா். அப்போது அதிமுக நிா்வாகிகள் அவருக்கு வீரவாள் பரிசளித்தனா்.

அப்போது அவா் செய்தியாளரிடம் கூறியது:

மத்தியில் ஆட்சி செய்யும் பாஜகவும், மாநிலத்தில் ஆட்சி செய்யும் திமுகவும் ஒருவா் மீது ஒருவா் குற்றம்சாட்டுகின்றனா். பிரதமா் நரேந்திர மோடி 10 ஆண்டுகளாக ஆட்சியில் இருக்கும்போது எதையும் செய்யாமல் தற்போது பல்வேறு வாக்குறுதிகளை வழங்கி வருகிறாா். பொதுமக்கள் இதை நம்ப ஏமாளிகள் இல்லை. தமிழகத்தில் பாஜக போட்டியில் இல்லை. திமுகவுக்கும், அதிமுகவுக்கும்தான் போட்டி என்றாா் அவா்.