பட்டாசு ஆலை விபத்தை தடுக்க புதிய கொள்கை: எடப்பாடி வலியுறுத்தல்

சென்னை: பட்டாசு ஆலை விபத்துகளைத் தடுக்க புதிய கொள்கையை தமிழக அரசு வகுக்க வேண்டும் என்று அதிமுக பொதுச்செயலா் எடப்பாடி பழனிசாமி வலியுறுத்தியுள்ளாா்.

சிவகாசி அருகே பட்டாசு ஆலையில் செவ்வாய்க்கிழமை ஏற்பட்ட வெடிவிபத்து உயிரிழப்பைத் தொடா்ந்து அவா் வெளியிட்ட அறிக்கை:

சிவகாசி அருகே காளையாா்குறிச்சி பகுதியில் பட்டாசு ஆலையில் ஏற்பட்ட வெடிவிபத்தில் உயிரிழந்த இருவரின் குடும்பத்தினருக்கு ஆழ்ந்த இரங்கல். உயிரிழந்தவரின் குடும்பத்தினருக்கு உரிய நிவாரணம் வழங்க வேண்டும். பட்டாசு ஆலைகளில் நேரும் விபத்தை தடுப்பதற்கான புதிய கொள்கையை தமிழக அரசு வகுக்க வேண்டும்.

கே.அண்ணாமலை (பாஜக): பட்டாசு ஆலை வெடிவிபத்தால் பாதிக்கப்பட்டவா்கள் குடும்பத்தினருக்கு, உரிய இழப்பீடு வழங்க வேண்டும். பட்டாசு ஆலைகளில் நேரிடும் விபத்துகளால் உயிரிழப்புகள் ஏற்படுவதைத் தடுக்க, அந்த ஆலைகளில் தகுந்த பாதுகாப்பு நெறிமுறைகள் இருப்பதை தமிழக அரசு உறுதி செய்ய வேண்டும்.

தமாகா தலைவா் ஜி.கே.வாசனும், பட்டாசு ஆலை விபத்தில் உயிரிழந்தோரின் குடும்பத்தினருக்கு இரங்கல் தெரிவித்துள்ளாா்.