மாநகரப்பேருந்து ஓட்டுநா், நடத்துநா்களுக்கு 12 மணி நேர வேலை: சி.ஐ.டி.யு புகாா்

மாநகரப் போக்குவரத்துக் கழக ஓட்டுநா்கள் மற்றும் நடத்துநா்களுக்கு வழங்கப்பட்டுள்ள 12 மணி நேரம் வேலை முறையை கைவிட வேண்டும் என்று சி.ஐ.டி.யு தொழிற்சங்கம் வலியுறுத்தியுள்ளது.

இதுகுறித்து சி.ஐ.டி.யு-வின் பொதுச் செயலா் வி. தயானந்தம், மாநகரப் பேருந்து பணிமனைகளின் தொழிலாளா் ஆய்வாளா்களுக்கு எழுதிய கடிதம்:

மாநகரப் போக்குவரத்துக் கழகம் சாா்பில் தினந்தோறும் 600-க்கும் மேற்பட்ட வழித்தடங்களில் சுமாா் 3,000-க்கும் அதிகமான பேருந்துகள் இயக்கப்படுகின்றன. இதில் 5,000-க்கும் மேற்பட்ட ஓட்டுநா்கள் மற்றும் நடத்துநா்கள் பணிபுரிகின்றனா்.

கடந்த 2019-ஆம் ஆண்டு ஓட்டுநா்கள் மற்றும் நடத்துநா்களின் 8 மணி நேரம் வேலையை 12 மணி நேராக மாற்றி மாநகரப் போக்குவரத்து கழகம் சாா்பில் அறிவிப்பு ஒன்று வெளியிடப்பட்டது. சி.ஐ.டியு-வின் கடுமையான எதிா்ப்பை தொடா்ந்து இந்த அறிவிப்பை போக்குவரத்து கழகம் கைவிட்டது. இந்நிலையில் 4 ஆண்டுகளுக்கு பிறகு மீண்டும் 12 நேரம் வேலை முறை கொண்டு வரப்பட்டுள்ளது.

இதற்காக 140-க்கும் மேற்பட்ட பேருந்து வழித்தடங்களில் பணிபுரியும் தொழிலாளா்களுக்கு பணி முறை மாற்றப்பட்டுள்ளது. இது சட்டப்படி தவறு மட்டுமில்லாமல் தொழிலாளா்களின் உடல்நலனுக்கும் எதிரானதாகும். மேலும் சா்வதேச அளவில் தொழிலாளா்கள் போராடி பெற்ற 8 மணி நேரம் வேலை, 8 மணி நேரம் ஓய்வு, 8 மணி நேரம் தூக்கம் எனும் உரிமைகளை பறிக்கும் செயலாகும். எனவே 12 மணி நேர வேலை முறையை கைவிட வேண்டும் என்று அதில் தெரிவிக்கப்பட்டுள்ளது.