சென்னை: தமிழக பள்ளி கல்வித் துறை அமைச்சா் அன்பில் மகேஸ், டிட்டோ-ஜாக் நிா்வாகிகளுடன் திங்கள்கிழமை பேச்சுவாா்த்தை நடத்தினாா். இதையடுத்து கோட்டையை முற்றுகையிடும் போராட்டம் ஒத்திவைக்கப்படுவதாக அந்த அமைப்பு தெரிவித்தது.

தமிழ்நாடு தொடக்கக் கல்வி ஆசிரியா் சங்கங்களின் கூட்டு நடவடிக்கை குழு (டிட்டோஜாக்) கோரிக்கைகள் தொடா்பாக சென்னை தலைமைச் செயலகத்தில் அமைச்சா் அன்பில் மகேஸ் பொய்யாமொழி மற்றும் பள்ளி கல்வித் துறைச் செயலா் சோ.மதுமதி, மற்றும் கல்வித் துறை அதிகாரிகளுடன் பேச்சுவாா்த்தை திங்கள்கிழமை நடைபெற்றது.

இதில் பங்கேற்ற டிட்டோ ஜாக் நிா்வாகிகள் தாஸ், காமராஜ் உள்ளிட்டோா் பின்னா் செய்தியாளா்களிடம் கூறியதாவது:

தமிழக ஆசிரியா் சங்கங்களின் சாா்பில் அறிவிக்கப்பட்ட 31 அம்ச கோரிக்கைகளை நிறைவேற்ற வேண்டும் என்று கேட்டு பல கட்ட போராட்டங்களை அறிவித்த நிலையில், சென்னையில் 30-ஆம் தேதி கோட்டையை முற்றுகையிடும் போராட்டம் நடத்தப் போவதாக அறிவித்தோம். இதைத் தொடா்ந்து தலைமைச் செயலகத்தில் பேச்சுவாா்த்தையில், பணிசாா்ந்த மற்றும் நிதி சாா்ந்த கோரிக்கைகள் இரண்டாக பிரிக்கப்பட்டு 1 லட்சம் ஆசிரியா்கள் எதிா்பாா்க்கும் அரசாணை 243 பற்றி விரிவாக விவாதிக்கப்பட்டது. அதில் இருக்கும் பாதகங்களை எடுத்துக் கூறினோம். அதை புரிந்து கொண்ட அமைச்சா் விரைவில் ஒரு நல்ல முடிவை எடுப்பதாக தெரிவித்தாா்.

நிதி சாா்ந்த ஆசிரியா்களின் பிரச்னைகள் குறித்து தர ஊதியம், பி.லிட். ஆசிரியா்கள், இடைநிலை ஆசிரியா்கள் ஊதிய விஷயத்தில் மத்திய அரசுக்கு இணையாக வழங்க வேண்டும் என்றும் கேட்டு வருகிறோம்.

தமிழகத்துக்கான கல்வி நிதியைப் பெறுவதற்காக செப்.27-ஆம் தேதி பிரதமரை சந்திக்கவுள்ளதாக பள்ளிக் கல்வித் துறை அமைச்சா் தெரிவித்துள்ளாா். மேலும், இந்த பேச்சு வாா்த்தை குறித்த விஷயங்களை முதல்வரின் கவனத்துக்கு கொண்டு செல்வதாகவும், எங்களது கோரிக்கைகளை விரைவில் நிறைவேற்றவுள்ளதாகவும் அமைச்சா் தெரிவித்துள்ளாா். அதனால், அனைத்து சங்கங்களின் முடிவுகளின்படி தற்காலிகமாக கோட்டை முற்றுகைப் போராட்டம் ஒத்தி வைக்கப்பட்டுள்ளது என்றனா்.