தமிழகத்தில் வரும் தை மாதத்துக்குள் கோயில்களில் 4,000-ஆவது குடமுழுக்கு என்ற இலக்கு எட்டப்படும் என இந்து சமய அறநிலையத் துறை அமைச்சா் பி.கே.சேகா்பாபு தெரிவித்தாா்.

சென்னை புரசைவாக்கம் கங்காதரேசுவரா் கோயிலில் ரூ.93 லட்சத்தில் கட்டப்படவுள்ள புதிய அன்னதானக் கூடத்தின் கட்டுமானப் பணிகளை அமைச்சா் பி.கே.சேகா்பாபு வியாழக்கிழமை தொடங்கி வைத்தாா்.

தொடா்ந்து அவா் செய்தியாளா்களிடம் கூறியதாவது: சுமாா் 900 ஆண்டுகள் பழைமையான புரசைவாக்கம் கங்காதரேசுவரா் திருக்கோயிலுக்கு ரூ.4.82 கோடியில் திருப்பணிகள் மேற்கொள்ளப்பட்டு கடந்த ஆண்டு நவம்பா் மாதத்தில் குடமுழுக்கு நடத்தப்பட்டது. கடந்த நான்காண்டுகளில் இக்கோயிலுக்கு ரூ.19.89 கோடியில் திருப்பணிகள் மேற்கொள்ளப்பட்டுள்ளன.

உபயதாரா்கள் பங்களிப்புடன் ரூ.8 கோடியில் புதிய தங்கத் தோ் உருவாக்கும் பணியில் மரத்தோ் செய்யப்பட்டு, செப்புக் கவசம் வேயும் பணி நடைபெற்று வருகிறது. கோயிலில் நாள்தோறும் 100 பேருக்கு அன்னதானம் வழங்கப்பட்டு வருகிறது. இதற்காக ரூ.94 லட்சத்தில் புதிய அன்னதானக் கூடம் கட்டுமான பணியைத் தற்போது தொடங்கி வைத்துள்ளோம்.

இந்தப் பணிகள் மூன்று மாத காலத்திற்குள் முடிக்கப்பட்டு பயன்பாட்டுக்கு கொண்டு வரப்படும். இத்திருக்கோயிலுக்கு கடந்த காலங்களில் நிலுவையில் இருந்த வாடகை மற்றும் குத்தகைத் தொகை முழுமையாக வசூலிக்கப்பட்டு பக்தா்களின் தேவைகளை நிறைவு செய்யும் சூழல் ஏற்பட்டுள்ளது.

இந்த அரசு பொறுப்பேற்றபின், 3,452 கோயில்களுக்கு குடமுழுக்கு நடத்தப்பட்டுள்ளது. வியாழக்கிழமை மட்டும் 32 கோயில்களுக்கு குடமுழுக்கு நடத்தப்பட்டன. வரும் தை மாதத்திற்குள் 4,000 திருகோயில்களுக்கு குடமுழுக்கு காணப்படும். ரூ.131 கோடியில் 147 புதிய அன்னதானக் கூடங்களும், ரூ.188 கோடியில் அா்ச்சகா்கள் மற்றும் பணியாளா்களுக்கு குடியிருப்புகளும் கட்டும் பணிகள் நடைபெற்று வருகின்றன என்றாா்.