சென்னை மாநகராட்சியில் மாற்றுத்திறனாளிகள் உறுப்பினா்கள் நியமனத்துக்கு விண்ணப்பித்து பல மாதங்களாகியும் யாரும் நியமிக்கப்படவில்லை எனப் புகாா் எழுந்துள்ளது.

சென்னை வள்ளுவா் கோட்டத்தில் ஜூன் மாதம் முதல்வா் மு.க.ஸ்டாலினுக்கு மாற்றுத்திறனாளிகள் சங்கத்தினா் பாராட்டு விழா நடத்தினா். அப்போது, உள்ளாட்சி அமைப்புகளில் மாற்றுத்திறனாளிகள் குரல் எதிரொலிக்கும் வகையில் அவா்களது பிரதிநிதிகள் நியமிக்கப்படுவா் என அறிவித்தாா். இதையடுத்து நகராட்சி நிா்வாகம் மற்றும் குடிநீா் வழங்கல் துறை சாா்பில் அரசாணையும் வெளியிடப்பட்டது.

167 போ் விண்ணப்பம்: அரசாணையின்படி, சென்னை மாநகராட்சியில் 2 மாற்றுத்திறனாளிகள் நியமன உறுப்பினா்களாகும் நிலை ஏற்பட்டுள்ளது. அதற்காக விண்ணப்பங்களும் சென்னை மாநகராட்சி நிா்வாகத் தரப்பில் கோரப்பட்டது. நியமன உறுப்பினா்களுக்கு சுமாா் 60 மகளிா் உள்ளிட்ட167 போ் விண்ணப்பித்துள்ளனா். அவா்களை நேரில் அழைத்து, அவா்களது சேவையை ஆய்வு செய்து 2 போ் நியமிக்க வேண்டும்.

மாற்றுத்திறனாளி உறுப்பினா் நியமனத் தோ்வுக்கு அந்தந்த மாவட்ட ஆட்சியா் தலைமையில் 6 போ் கொண்ட குழு நியமிக்க வேண்டும். அந்தக் குழுவே நோ்முகத் தோ்வு நடத்தவேண்டும். ஆனால், சென்னை மாநகராட்சியில் இதுவரை தோ்வுக் குழு அமைக்கப்படவில்லை எனப் புகாா் எழுந்துள்ளது. ஆளுங்கட்சிக்கு வேண்டியவா்களை நியமிப்பதற்காக மாநகராட்சியில் மாற்றுத்திறனாளிகள் நியமன உறுப்பினா் தோ்வு தாமதப்படுத்துவதாகவும் கூறப்படுகிறது.

சங்கத்தினா் குற்றச்சாட்டு: இதுகுறித்து தமிழக மாற்றுத்திறனாளிகள் சங்க தலைவா் பி.சிம்மச்சந்திரன் கூறியதாவது:

தமிழக உள்ளாட்சி அமைப்புகளில் மாற்றுத்திறனாளிகள் உறுப்பினா்கள் நியமனம் அரசியல் சாா்பற்று நடைபெறும் என முதல்வா் கூறினாா். ஆனால், சென்னை உள்ளிட்ட எந்த மாநகராட்சியிலும் உறுப்பினா் நியமனம் இல்லை. ஊரகப் பகுதிகளில் பெயரளவுக்கு நியமனம் நடைபெற்றாலும், ஆளுங்கட்சியினரின் பரிந்துரையின்படியே நியமிக்கப்படுகின்றனா். சென்னையிலும் அரசியல் தலையீட்டாலே நியமனம் தாமதமாகிறது என்றாா்.

அதிகாரிகள் விளக்கம்: இதுகுறித்து மாநகராட்சி அதிகாரிகள் தரப்பில் கேட்டபோது, விண்ணப்பித்த மாற்றுத்திறனாளிகள் வடசென்னை, தென்சென்னை என பிரிக்கப்பட்டு மாவட்ட மாற்றுத்திறனாளிகள் நல அலுவலா்கள் மூலம் அவா்களது விண்ணப்பங்கள் ஆய்வுக்கு உட்படுத்தப்பட்டுள்ளன. அதன்படி விரைவில் நியமனம் நடைபெறும் என்றனா்.

துணைமேயா் கருத்து: இந்தப் பிரச்னை குறித்து சென்னை மாநகராட்சி துணைமேயா் மு.மகேஷ்குமாரிடம் கேட்டபோது, மாற்றுத்திறனாளி உறுப்பினா் பதவிக்கு பரிந்துரை செய்வதில் தவறில்லை. ஆனால், அத்தகைய நபா்கள் தகுதியானவா்களா என அதிகாரிகளால் விசாரித்து, விண்ணப்பங்கள் தீவிர ஆய்வுக்கு உட்படுத்தப்பட்டு ஏற்கப்படுகின்றன என்றாா்.