மக்கள் மனதில் நிற்கும் திட்டங்களை திமுக அரசு செயல்படுத்தி வருகிறது என வேளாண்மைத்துறை அமைச்சா் எம்.ஆா்.கே. பன்னீா்செல்வம் வியாழக்கிழமை தெரிவித்தாா்.

திமுக சாா்பில் ‘என் வாக்குச்சாவடி வெற்றி வாக்குச்சாவடி’ என்ற முழக்கத்துடன் தமிழகம் முழுவதும் பிரசாரம் மேற்கொள்ளப்பட்டுள்ளது. இதன் ஒரு பகுதியாக காஞ்சிபுரம் மாநகராட்சிக்குட்பட்ட பிள்ளையாா்பாளையம் பகுதியில் வாக்குச்சாவடி மையங்களில் பணியாற்றும் முகவா்களுடனான ஆலோசனைக் கூட்டம் நடைபெற்றது.

கூட்டத்துக்கு மாவட்ட செயலாளரும்,எம்எல்ஏவுமான க.சுந்தா் தலைமை வகித்தாா். எம்எல்ஏ எழிலரசன், மேயா் எம்.மகாலட்சுமி யுவராஜ், மாநகர செயலாளா் சிகேவி தமிழ்ச்செல்வன் ஆகியோா் முன்னிலை வகித்தனா்.

கூட்டத்தில் மாவட்ட தோ்தல் பொறுப்பாளரும், அமைச்சருமான எம்ஆா்கே. பன்னீா் செல்வம் கலந்து கொண்டு வாக்குச்சாவடிகளில் பணிபுரியும் திமுக முகவா்களின் பணிகள் குறித்தும் கடந்த இரு தோ்தல்களிலும் பெற்றுத்தந்த வாக்குகள் குறித்த புள்ளி விபரங்களோடும் ஆலோசனை நடத்தினாா். கடந்த தோ்தல்களை விட வரும் பேரவைத் தோ்தலில் கூடுதல் வாக்குகள் பெறும் வழிமுறைகளையும் விளக்கினாா்.

இதனைத் தொடா்ந்து செய்தியாளா்களிடம் அவா் கூறியது:

மக்கள் மனதில் நிற்கும் வகையில் மகளிா் உரிமைத் தொகை திட்டம்,மகளிா் பேருந்து பயணம் என நல்ல திட்டங்களை தமிழக அரசு செயல்படுத்தி வருகிறது. தமிழக அரசு செயல்படுத்தி வரும் திட்டங்களில் பலவற்றையும் பிற மாநில அரசுகள் பாராட்டுவது மட்டுமின்றி பின்பற்றவும் செய்கின்றன.அதிமுக கலைந்து வரும் நிலையில் ஆட்சிக்கு வருவோம் என்று எடப்பாடி கே.பழனிசாமி கூறி வருவது வியப்பாக இருக்கிறது என்றாா் அமைச்சா் பன்னீா் செல்வம்.

அப்பகுதியில் உள்ள வணிக நிறுவனங்களில் திமுக அரசின் நலத்திட்டங்கள் குறித்த விழிப்புணா்வு துண்டுப் பிரசுரங்களையும் அமைச்சா் உள்ளிட்ட திமுக நிா்வாகிகள் வழங்கினா்.