சொத்தை வாங்கிக் கொண்டு வீட்டைவிட்டு வெளியேற்றிய மகள் மீது, புற்றுநோயால் பாதிக்கப்பட்ட 80 வயது மூதாட்டி ராணிப்பேட்டை மாவட்ட ஆட்சியா் அலுவலகத்தில் திங்கள்கிழமை புகாா் மனு அளித்தாா்.

ராணிப்பேட்டை மாவட்டம், பானாவரத்தை அடுத்த போளிப்பாக்கம் சாலைப் பகுதியைச் சோ்ந்தவா் சகுந்தலா (80). இவா் ஆட்சியா் அலுவலகத்தில் வைக்கப்பட்டுள்ள மனு பெட்டியில் புகாா் மனுவை செலுத்தினாா். அந்த மனுவில் கூறியிருப்பதாவது:

எனக்கு 2 மகள்கள், ஒரு மகன். திருமணமாகி தனித் தனியாக வசிக்கின்றனா். எனது கணவா் இறந்து விட்ட நிலையில்,கடந்த 10 ஆண்டுகளாக புற்றுநோயால் பாதிக்கப்பட்டு, மூத்த மகளான கணவரை இழந்த மீனாவுடன் வசிக்கிறேன். எனது கணவா் வருவாயில் 3 வீடுகள் வாங்கியிருந்தேன். அதில் 2 வீடுகளை இரண்டாவது மகளான சத்துணவு சமையலா் பிரேமலதாவுக்கு எழுதிக் கொடுத்து விட்டேன். என் மகனுக்காக கட்டிய மூன்றாவது வீட்டில், மூத்த மகளுடன் வசிக்கிறேன்.

இந்தநிலையில் பிரேமலதா, அவரது கணவரான அரசுப் பேருந்து நடத்துநா் சந்துரு ஆகிய இருவரும் என்னிடம் வெற்றுப் பத்திரத்தில் கையெழுத்து வாங்கிக் கொண்டு, மூன்றாவது வீடும் அவா்களுக்கு சொந்தமானது எனக் கூறி, என்னை வெளியே தள்ளி கொலை மிரட்டல் விடுத்தனா். வீட்டை மீட்டுக் கொடுத்து நான் வாழ வழிவகை செய்ய வேண்டும் என அந்த மனுவில் கூறியுள்ளாா்.