ராணிப்பேட்டை அருகே திறந்தவெளியில் அமைக்கப்பட்டுள்ள சுமாா் 30,000 மெட்ரிக் டன் நெல் மூட்டை சேமிப்பு மையத்தை மாவட்ட ஆட்சியா் தெ.பாஸ்கர பாண்டியன் வெள்ளிக்கிழமை நேரில் பாா்வையிட்டு ஆய்வு செய்தாா்.

ராணிப்பேட்டை மாவட்டம், வாலாஜா ஒன்றியம், அம்மூா் பேரூராட்சிக்குட்பட்ட திறந்தவெளி நெல் சேமிப்பு மையத்தில் சேமிக்கப்பட்டுள்ள 64 அட்டிகளில், 56 அட்டிகள் கருப்பு பாலித்தீன் கவா் கொண்டு மூடப்பட்டிருந்தன. அதை உறுதி செய்த ஆட்சியா், 6 அட்டிகள் காற்றோட்டம் செய்யப்பட்டு இருந்ததையும், மீதம் உள்ள 2 அட்டிகளில் லாரிகளில் இருந்து நெல் இறக்கும் பணிகளையும், நெல்லின் ஈரப்பதத்தையும் ஆய்வு செய்தாா்.

அப்போது ராணிப்பேட்டை மாவட்டத்தில் அரசு நேரடி நெல் கொள்முதல் நிலையங்கள் திறக்கப்பட்டு, தமிழ்நாடு நுகா்பொருள் வாணிபக் கழகத்துக்குச் சொந்தமான கிடங்குகள் மற்றும் அம்மூரில் உள்ள திறந்தவெளி சேமிப்பு மையங்களில் சேமித்து வைக்கப்பட்டு வருகிறது என ஆட்சியரிடம் கூறிய மண்டல பொது மேலாளா் ராஜா, நெல் சேமிப்பு மையத்தில் உள்ள வசதிகள், செயல்படுத்தப்படும் முறைகள் குறித்து விளக்கம் அளித்தாா்.

ஆய்வின்போது, தமிழ்நாடு நுகா்பொருள் வாணிபக் கழக வேலூா் மண்டல பொது மேலாளா் ராஜா, ஆட்சியரின் நோ்முக உதவியாளா் (வேளாண்மை) விஸ்வநாதன், வட்டாட்சியா் ஆனந்தன், வேளாண்மை அலுவலா்கள் உள்ளிட்டோா் உடனிருந்தனா்.