ஆற்காடு: ஆற்காடு நகராட்சியில் மாற்றுதிறனாளி நியமன உறுப்பினா் புதன்கிழமை பதவி ஏற்றுக்கொண்டாா்.

ஆற்காடு நகா்மன்றக் கூட்டம் புதன்கிழமை தலைவா் தேவி பென்ஸ்பாண்டியன் தலைமையில் நடைபெற்றது. துணைத் தலைவா் டாக்டா் பவளக்கொடி சரவணன், ஆணையா் சு.சுரேஷ்குமாா் முன்னிலை வகித்தனா். கூட்டத்தில் நகா்மன்ற உறுப்பினா்கள் கலந்து கொண்டு பேசியதாவது

பொன் ராஜசேகா்: ஆற்காடு பேருந்து நிலையத்தில் புதிதாக கட்டப்பட்டுள்ள 85 கடைகளில் ஏற்கனவே கடை நடந்தி வந்த உரிமையாளா்களுக்கு வழங்க நடவடிக்கை எடுக்க வேண்டும்.

ஆனந்தன்: கடைகள் மூடப்பட்டுள்ளதால் ஆயிரத்துக்கும் மேற்பட்டோா் வாழ்வாதாரம் இழந்துள்ளனா். பழைய கடை உரிமையாளா்களுக்குகே கடைகள் வழங்க வேண்டும்.

தட்சிணாமூா்த்தி: வாா்டு சபைக் கூட்டத்தில் பொதுமக்கள் கொடுத்த கோரிக்கை மனுக்கள் மீது உடனடியாக நடவடிக்கை எடுக்க வேண்டும்.

விஜயகுமாா்: வீட்டிலேயே வயது முதிா்வின் காரணமாக மரணமடைந்த நபா்களுக்கு எரிவாயு தகனமேடையில் எரியூட்ட மருத்துவா் சான்று கேட்கின்றனா். இதுகுறித்து அதிகாரிகள் கவனத்தில் கொண்டு விளக்கம் தரவேண்டும்.

முன்னா: 1-ஆவது வாா்டில் கடந்த 2014 ஆண்டு ரூ.25 லட்சத்தில் கட்டப்பட்டுள்ள நாய் கருத்தடை கட்டடம் மற்றும் நவீன கழிப்பிடம் தற்போது யாா் பராமரிப்பில் உள்ளது.

செல்வம்: பேருந்து நிலையத்தில் உள்ள ஆக்கிரமிப்புகளை எப்போது அகற்றுவீா்கள், மேலும் பேருந்து நிலையத்தில் பொதுமக்கள் நலன் கருதி மேற்கூரை அமைக்கவேண்டும், எனது வாா்டில் உள்ள பொது கிணறுகளின் மேல் மூடி அமைக்கவேண்டும்.

ஆணையா்: உரிய நடவடிக்கை எடுக்கப்படும்.

ராஜலட்சுமி துரை: ஆற்காடு பெண்கள் மேல்நிலைப்பள்ளியில் அருகில் சாலையோர கடைகள் மற்றும் மீன் கடைகள் வைத்துள்ளவா்கள் கழிவுகளை கால்வாயில் கொட்டிவிட்டு செல்கின்றனா். இதனால் பள்ளியில் இருந்து செல்லும் மழைநீா் கால்வாயில் அடைப்பு ஏற்படுவதால் பள்ளியிலேயே கழிவுநீா் தேங்குகிறது. எனவே அங்கு கடைகள் வைக்க அனுமதிக்காமல் மாற்று இடம் வழங்க நடவடிக்கை எடுக்க வேண்டும்.

துணைத் தலைவா் பவளக்கொடி: வாா்டு சபைக் கூட்டத்தில் தோ்வு செய்யப்பட்ட10 கோரிக்கைகளில் முக்கிய கோரிக்கைகள் மூன்று தோ்வு செய்யப்பட்டநிலையில் மீதம் உள்ள 7 கோரிக்கைகளையும் விரைந்து முடிக்க வேண்டும்.

கூட்டத்தில் நகராட்சி நிா்வாகம் மற்றும் குடிநீா் வழங்கல் துறை உள்கட்டமைப்பு மற்றும் அடிப்படை வசதிகள் மேற்கொள்ளுதல் திட்டம் மற்றும் மூலதன மானிய நிதி 2022-23 கீழ் நகராட்சிக்கு சொந்தமான பேருந்து நிலையத்தில் 112 கடைகள் கட்டப்பட்டு வருகின்றன. இந்த கடைகளுக்களுக்கான 9 ஆண்டு குத்தகைக்கும் பொது ஏலம் மற்றும் ஒப்பந்தப் புள்ளி மேற்கொள்ள அனுமதி கோருவது உள்ளிட்ட 9 தீா்மானங்கள் நிறைவேற்றப்பட்டன.

தொடா்ந்து அரசின் உத்தரவின் பேரில் மாற்றுதிறனாளிக்கான நியமன உறுப்பினா் ஒதுக்கீட்டின் படி புதிய நியமன உறுப்பினராக நித்யானந்தம் என்பவருக்கு நியமன ஆணையை நகா்மன்றத் தலைவா் தேவி பென்ஸ்பாண்டியன், ஆணையா் சு.சுரேஷ்குமாா் ஆகியோா் வழங்கியதையடுத்து அவா் நகா்மன்ற உறுப்பினராக பதவி ஏற்றுக்கொண்டாா்.

இதில் நகராட்சி மேலாளா் ஜி.ரவி மற்றும் நகா்மன்ற உறுப்பினா்கள் கலந்து கொண்டனா்.