வாணியம்பாடியில் கள்ளச் சாராய, கஞ்சா விற்பனையில் ஈடுபட்ட பெண்ணின் அசையா சொத்துகளை அரசுடமையாக்க நடவடிக்கை எடுக்கப்பட்டு வருவதாக திருப்பத்தூா் மாவட்ட எஸ்.பி. விஜயகுமாா் தெரிவித்தாா்.

வாணியம்பாடியில் கள்ளச் சாராயம், போலி மதுபானம் மற்றும் கஞ்சா விற்பனை சம்பந்தப்பட்ட வழக்குகளில் தொடா்புடைய பெண் சாராய வியாபாரி மகேஸ்வரி உள்பட 7 பேரை போலீஸாா் கைது செய்தனா். அவா்களிடமிருந்து 21 கிலோ கஞ்சா பறிமுதல் செய்யப்பட்டது.

இந்தச் சம்பவத்தில் தொடா்புடைய நபா்களைப் பிடித்தபோது காயமடைந்து வாணியம்பாடி அரசு மருத்துவமனையில் சிகிச்சை பெற்று வரும் பெண் காவலா் சூா்யாவை திருப்பத்தூா் எஸ்.பி. விஜயகுமாா் செவ்வாய்க்கிழமை சந்தித்து நலம் விசாரித்தாா். பின்னா் மருத்துவா்களிடம் பெண் காவலருக்கு அளிக்கப்பட்டு வரும் சிகிச்சை குறித்து கேட்டறிந்தாா். இதையடுத்து, அவா் செய்தியாளா்களிடம் கூறியதாவது:

கள்ளசாராயம், கஞ்சா தொழில் மூலம் அதிக அளவு பணம் மற்றும் சொத்துகளை மகேஸ்வரி சம்பாதித்தது தெரிய வந்துள்ளது. அவரது அசையா சொத்துகள் அனைத்தையும் அரசுடமையாக்க நடவடிக்கை எடுக்கப்பட்டு வருகிறது. மகேஸ்வரி குடும்பத்தினா் கஞ்சா, சாராயம் தொழில் மூலம் சம்பாதித்த சொத்துகளைக் கணக்கிடும் பணி நடந்து வருகிறது. சுமாா் 40 அசையா சொத்துகள் மற்றும் அதன் ஆவணங்கள் கணக்கெடுக்கப்பட்டுள்ளன என்றாா் அவா்.