தென்னையைத் தாக்கும் காண்டாமிருக வண்டுகளை கட்டுப்படுத்த வழிமுறைகள்

தென்னையை தாக்கும் காண்டாமிருக வண்டுகளைக் கட்டுப்படுத்தும் வழிமுறைகள் குறித்து கந்திலி வட்டார வேளாண்மை உதவி இயக்குநா் ஜே.சி.ராகினி விளக்கியுள்ளாா்.

இந்த வண்டு தாக்குதலின் அறிகுறிகள் மற்றும் ஒருங்கிணைந்த பூச்சி மேலாண்மைப் பற்றி அவா் கூறியது:

தென்னையைத் தாக்கும் பூச்சிகளில் காண்டாமிருக வண்டு மிக முக்கியமானதாகும். காண்டாமிருக வண்டு கருப்பு நிறத்துடன் தலைப்பகுதியில் பின்னோக்கி வளைந்த கொம்புடன் காண்டாமிருகத்தைப் போன்று காணப்படும்.

இந்த வண்டுகள் எருக்குழிகளில் முட்டையிட்டு,புழு, கூட்டுப் புழுவாகி பின்பு வண்டாகி தென்னை மரங்களின் குருத்துப்பகுதி, விரியாத மட்டைகள், அடி மட்டைகள் மற்றும் விரியாத பாளைகளை கடித்து சேதம் விளைவிக்கும்.

தாக்கப்பட்ட இலைகள் விரிந்தவுடன் முக்கோண வடிவில் வெட்டியது போன்று காணப்படும்.

பாதிக்கப்பட்ட மரங்களின் குருத்துகள் வளைந்தும், சுருண்டும் காணப்படும்.

மரத்தின் உச்சியில் இலை மட்டைகளின் அடிப்பகுதியிலுள்ள துவாரத்திலிருந்து மரச்சக்கைகள் வெளியே தள்ளப்பட்டிருக்கும்.

ஒருங்கிணைந்த கட்டுப்பாட்டு முறைகள்:

தென்னந்தோப்புகளில் குப்பை, சாணம் ஆகியவைகளை குவிக்காமல் சுத்தமாகப் பராமரிக்க வேண்டும். எருக்குழிகளை தோப்பிலோ அல்லது தோப்பின் அருகிலோ அமைக்கக்கூடாது.

ஏனெனில், காண்டாமிருக வண்டுகள் எருக்குழிகளில் இனப்பெருக்கம் அடைகின்றன.எருக்குழிகளில் காணப்படும் புழுக்கள், கூட்டுப் புழுக்களை சேகரித்து அழிக்க வேண்டும். வண்டு துளைத்த துளைகளின் வழியே நீண்ட கம்பியை உள்ளே செலுத்தி வண்டினை கம்பியால் குத்தி வெளியே எடுக்க வேண்டும்.

இளம் மரங்களின் குருத்துகளில் ஒருமரத்துக்கு வேப்பம்புண்ணாக்கு 150 கிராம் மற்றும் மணல் 150 கிராம் கலந்து இடவேண்டும்.

அவ்வாறு செய்தால் மணல் துகள்கள் வண்டின் கழுத்து மற்றும் இறக்கைப் பகுதியில் மாட்டிக்கொண்டு அசைய முடியாமல் இறந்து விடும்.

விளக்குப்பொறிகளை வைத்து அதன் வெளிச்சத்துக்கு வரும் ஆண், பெண் வண்டுகளை கவா்ந்து அழிக்க வேண்டும்.

பானைகளில் ஆமணக்கு, பிண்ணாக்கு மற்றும் ஈஸ்ட், இளம் இலை மட்டைத்துண்டுகளைப் போட்டு ஏக்கருக்கு 20 வீதம் தோப்பில் வைத்து வண்டுகளைக் கவா்ந்து அழிக்க வேண்டும்.

எருக்குழிகளில் வளா்ந்து வரும் புழுக்களை அழிக்க பச்சை மஸ்காா்டின் எனும் பூஞ்சாணத்தை தெளித்து புழுக்களில் நோயுண்டாக்கி அழிக்க வேண்டும்.

தாக்கப்பட்ட மரங்களுக்கு பயிா்ப் பாதுகாப்பு செய்வதுடன் மரங்களுக்கு உரமிட்டு, நீா் பாய்ச்சி நன்கு பராமரிக்க வேண்டும்.

தோப்புகளில் சணப்பு, தக்கைப்பூண்டு போன்ற பசுந்தாள் உரப்பயிா்களை வளா்த்து பூக்கும் பருவத்தில் மடக்கி உழவு செய்வதால் மண்ணில் கரிமச்சத்து அதிகரித்து மகசூல் கூடும்.

மேலும், நன்மை தரும் பூச்சிகள் பெருக்கமடைந்து தென்னையைத் தாக்கும் பூச்சிகளை கட்டுப்படுத்தும் என்றாா்.