ஆட்சி மாற்றத்துக்கு இன்னும் 130 நாள்கள்தான் உள்ளது என பாஜக மாநில தலைவா் நயினாா் நாகேந்திரன் கூறினாா்.

திருப்பத்தூா் மாவட்டம், வாணியம்பாடியில் மாவட்ட பாஜக சாா்பில் ட‘தமிழகம் தலைநிமிர தமிழனின் பயணம்’ எனும் தொடா் பயணத்தின் பொதுக் கூட்டம் திங்கள்கிழமை நடைபெற்றது.

கூட்டத்துக்கு மாவட்டத் தலைவா் எம்.தண்டாயுதபாணி தலைமை வகித்தாா். மாநில பொதுச் செயலாளா் காா்த்தியாயினி, மாநில செயலாளா் கொ.வெங்கடேசன், மாநில செயற்குழு உறுப்பினா் சி.வாசுதேவன் ஆகியோா் முன்னிலை வகித்தனா். மாவட்டச் செயலாளா் வி.வேலு, மாவட்ட துணைத் தலைவா் எம்.ஞானதாஸ், நகரத் தலைவா் கோபிநாத் வரவேற்றனா்.

நிகழ்ச்சியில், தமிழக பாஜக மாநில தலைவா் நயினாா் நாகேந்திரன் கலந்துகொண்டு பேசியது: திருப்பத்தூா் மாவட்டத்தில் ஜவ்வாது மலை கிராமங்களில் சாலை வசதி இல்லை, மருத்துவ வசதி இல்லை, மருத்துவா்கள் இல்லை. மாவட்டம் முழுவதும் சாலைகளில் கழிவுநீா் ஆறாக ஓடுகிறது. இந்த மாவட்டத்தில் பெரும்பான்மை மக்கள் இஸ்லாமியா்கள். இஸ்லாமியா்கள் நலன் காக்க முத்தலாக் சட்டத்தை பாஜக கொண்டு வந்தது. இன்னும் 130 நாள்கள் தான் உள்ளது. அதன் பின் நிச்சயம் ஆட்சிமாற்றம் ஏற்படும். தமிழகம் முழுவதும் அதற்கான மாற்றம் மக்கள் மனதில் உருவாகி விட்டது என்றாா்.

கூட்டத்தில் அதிமுக சாா்பில், முன்னாள் அமைச்சா் கே.சி.வீரமணி, வாணியம்பாடி தொகுதி எம்எல்ஏ கோ.செந்தில்குமாா், முன்னாள் எம்எல்ஏ கோவி.சம்பத்குமாா் மற்றும் பாஜகவைச் சோ்ந்த மாவட்ட, நகர, ஒன்றிய, பேரூராட்சி நிா்வாகிகள், தொண்டா்கள், பல்வேறு அணியைச் சோ்ந்த நிா்வாகிகளும் கலந்து கொண்டனா்.