ஜோலாா்பேட்டை அருகே தை அமாவாசையை முன்னிட்டு பெண்கள் பால் குடம் ஏந்தி ஊா்வலமாக சென்று ஸ்ரீ மலையடி காளியம்மனுக்கு அபிஷேகம் செய்து வழிபட்டனா்.

ஜோலாா்பேட்டை அடுத்த ஏலகிரி கிராமம் ஊராட்சி பகுதிக்கு உட்பட்ட தாமரை குளம் பகுதியில் அமைந்துள்ள ஸ்ரீ மலையடி காளியம்மன் ஆலயத்தில் நேற்று தை அமாவாசை முன்னிட்டு சிறப்பு அலங்காரம் செய்தனா்.

அதைத் தொடா்ந்து அரியான் வட்டம், நாட்டான் வட்டம், முருகன் வட்டம், தானன் வட்டம், பால்காரன் வட்டம், குள்ளக் கிழவன் வட்டம், வக்கணம்பட்டி உள்ளிட்ட பல்வேறு பகுதிகளிலிருந்து சுமாா் 250-க்கும் மேற்பட்ட பெண்கள் பால்குடம் ஊா்வலமாக ஏந்தி கோயில் வளாகம் வந்து அடைந்து ஸ்ரீ மலையடி காளியம்மனுக்கு அபிஷேகம் செய்து வழிபட்டனா்.

தொடா்ந்து பால்குடம் ஏந்தி பெண்களுக்கு கோயில் நிா்வாகம் சாா்பில் வளையல், மஞ்சள், குங்குமம், பழங்கள் மற்றும் தட்டு உள்ளிட்ட மங்கல பொருள்களை வழங்கினா். முன்னதாக அன்னதானம் வழங்கப்பட்டது.

இதற்கான ஏற்பாடுகளை கிளாசிக் கோவை அன்பு மற்றும் ஸ்ரீ மலையடி காளியம்மன் கோயில் நிா்வாகிகள் ஊா் கவுண்டா் கண்ணதாசன், நாட்டாண்மை சென்றாயன், ஊா் தா்மகா்த்தா காளிதாசன், கோயில் தா்மகா்த்தா செல்வம் மற்றும் கோயில் நிா்வாகிகள் செய்திருந்தனா்.