பூண்டி ஏரியில் மீன் பிடிக்கச் சென்ற மீனவா் சாவு

திருவள்ளூா் அருகே ஏரியில் மீன் பிடிக்கச் சென்ற மீனவா் மாரடைப்பால் உயிரிழந்தாா்.

திருவள்ளூா் பகுதியில் பருவமழையால் ஏரிகள் மற்றும் நீா் நிலைகள் நிரம்பி உள்ளன. புது நீா் வரத்தால் மீன்கள் வரத்தும் அதிகம் உள்ளதால், கிராமங்களைச் சோ்ந்தோா் வலைவீசியும், தூண்டில் வீசியும் மீன் பிடிக்கவும் வந்து செல்கின்றனா். இதேபோல், திருவள்ளூா் அருகே பட்டரைபெருமந்தூா் மாதா கோயில் தெருவைச் சோ்ந்தவா் கட்டி என்ற சண்முகம் (57). இவா் ஏரியில் படகில் சென்று மீன்பிடிக்கும் தொழில் செய்து வந்தாா்.

இந்நிலையில், இவா் வழக்கம் போல் சனிக்கிழமை காலை சுங்கச்சாவடி அருகே பூண்டி ஏரியில் படகில் மீன் பிடிக்கச் சென்றாராம். இதையடுத்து, மற்றொரு மீனவா் சென்று பாா்த்தபோது ஏரியோரம் குடையுடன் முழங்காலிட்டபடி தலைகுப்புற கவிழ்ந்த நிலையில் கிடந்துள்ளாா். உடனே போலீஸாா் மற்றும் கிராம மீனவா் சங்கத்தினருக்கு தகவல் தெரிவித்தனா். அதைத் தொடா்ந்து, மீனவா் சங்கத்தினா் மற்றும் திருவள்ளூா் கிராமிய போலீஸாா் விரைந்து வந்து பாா்த்தனா். அப்போது, திடீா் மாரடைப்பால் அவா் உயிரிழந்தது தெரியவந்தது.

இது குறித்து கிராமிய போலீஸாா் வழக்குப் பதிந்து விசாரித்து வருகின்றனா்.