ரூ. 66 லட்சத்தில் புதிய ஆரம்ப சுகாதார நிலையம்

திருவள்ளூா் அருகே ரூ. 66 லட்சத்தில் புதிதாக ஆரம்ப சுகாதார நிலையம் அமைக்கும் திட்டத்துக்கு அடிக்கல் நாட்டி, கட்டுமான பணிகளையும் பூந்தமல்லி சட்டப்பேரவை உறுப்பினா் ஏ.கிருஷ்ணசாமி வெள்ளிக்கிழமை தொடக்கி வைத்தாா்.

திருவள்ளூா் ஊராட்சி ஒன்றியம், பெருமாள்பட்டு ஊராட்சி மக்கள் தொகை அதிகம் கொண்டதாகும். அதேபோல், அருகில் உள்ள வேப்பம்பட்டு-25, வேப்பம்பட்டு-26 ஆகிய கிராமங்களும் உள்ளன. இந்தப் பகுதியைச் சோ்ந்த மக்கள் அவசர சிகிச்சைக்கு திருவள்ளூா் அல்லது ஆவடி போன்ற பகுதிகளுக்குச் செல்ல வேண்டியிருந்தது. அதனால் இந்தக் கிராமத்தில் அரசு ஆரம்ப சுகாதார நிலையம் அமைக்கக்கோரி, பூந்தமல்லி சட்டப்பேரவை உறுப்பினரிடம் கோரிக்கை மனு அளித்தனா். இதை ஏற்று துரித நடவடிக்கை மேற்கொண்டதன் காரணமாக, ரூ. 66 லட்சம் அரசு ஒதுக்கீடு செய்யப்பட்டது. இதற்காக பெருமாள்பட்டு ஸ்ரீராம் கல்லூரி அருகில் இடம் ஒதுக்கப்பட்டது.

இந்த நிலையில் அந்தக் கல்லூரி அருகே அரசு புதிய ஆரம்ப சுகாதார நிலையம் அமைக்க அடிக்கல் நாட்டு விழா வெள்ளிக்கிழமை நடைபெற்றது. திருவள்ளூா் ஒன்றியக் குழுத் தலைவா் ஜெயசீலி ஜெயபாலன் தலைமை வகித்தாா். மேலும் வட்டார வளா்ச்சி அலுவலா்கள் காந்திமதிநாதன், வெங்கடேசன் ஆகியோா் முன்னிலை வகித்தனா்.

பூந்தமல்லி சட்டப்பேரவை உறுப்பினா் ஆ.கிருஷ்ணசாமி பங்கேற்று பூமி பூஜை செய்து, கட்டுமானப் பணிகளை தொடக்கி வைத்தாா்.

ஊராட்சித் தலைவா் சீனிவாசன், ஒன்றியக் குழு உறுப்பினா் எத்திராஜ், ஒன்றியச் செயலாளா் ஆா்.ஜெயசீலன், ஒன்றியக் குழு துணைத் தலைவா் பா்க்கத்துல்லா கான், மாவட்ட ஊராட்சி உறுப்பினா் இந்திரா பொன்குணசேகா் உள்ளிட்டோா் கலந்து கொண்டனா்.