போளூரை அடுத்த படவேடு ஸ்ரீரேணுகாம்பாள் கோயிலில் உண்டியல் காணிக்கை எண்ணப்பட்டதில் ரூ.46.91 லட்சம் காணிக்கை பணம் இருந்தது.

திருவண்ணாமலை மாவட்டம், போளூா் அருகேயுள்ள படவேடு கிராமத்தில் ஸ்ரீரேணுகாம்பாள் கோயில் அமைந்துள்ளது. இந்தக் கோயிலில் 11 உண்டியல்கள் உள்ளன. உண்டியல்களில் பக்தா்கள் செலுத்தும் காணிக்கை 3 மாதங்களுக்கு ஒருமுறை எண்ணப்பட்டு வருகிறது.

இந்த நிலையில், கோயில் உதவி ஆணையா் ஜோதிலட்சுமி தலைமையில் 11 உண்டில்களையும் திறந்து காணிக்கை எண்ணும் பணி அண்மையில் நடைபெற்றது.

இதில் ரூ.46 லட்சத்து 91ஆயிரம் ரொக்கம், 537 கிராம் தங்கம், 678 கிராம் வெள்ளியை பக்தா்கள் காணிக்கையாக செலுத்தியிருந்தனா்.

கோயில் பணியாளா்கள், தன்னாா்வலா்கள், பக்தா்கள் காணிக்கை எண்ணும் பணியில் ஈடுபடுத்தப்பட்டனா்.

செயல் அலுவலா் சிவஞானம், ஆய்வாளா்கள் ரவிகணேஷ், சத்யா, மேலாளா் மகாதேவன் ஆகியோா் உடனிருந்தனா்.