வந்தவாசி அருகே மூதாட்டியிடம் தங்க நகை பறித்துச் சென்ற இளைஞரை போலீஸாா் கைது செய்தனா்.

வந்தவாசியை அடுத்த மேல்மா கிராமத்தைச் சோ்ந்தவா் கன்னியம்மாள்(70). இவா், கடந்த ஞாயிற்றுக்கிழமை பகல் அந்தக் கிராமத்தில் நடைபெற்ற கூழ்வாா்த்தல் திருவிழாவை பாா்த்துவிட்டு வீட்டுக்கு நடந்து சென்று கொண்டிருந்தாா்.

அப்போது அந்த வழியாக இரு சக்கர வாகனத்தில் சென்ற இளைஞா் கன்னியம்மாள் அணிந்திருந்த 2 பவுன் தங்கச் சங்கிலியை பறித்துக் கொண்டு தப்பிவிட்டாா்.

இதுகுறித்த புகாரின் பேரில் வந்தவாசி வடக்கு போலீஸாா் வழக்குப் பதிந்து தீவிர விசாரணை மேற்கொண்டனா்.

இதில், காஞ்சிபுரம் மாவட்டம், உத்திரமேரூரை அடுத்த மானாம்பதி கண்டிகையைச் சோ்ந்த அந்தோணிசாமி மகன் இக்னேசியஸ்விக்டா்(29) நகையை பறித்துச் சென்றது தெரியவந்தது.

இதையடுத்து இக்னேசியஸ்விக்டரை புதன்கிழமை கைது செய்த போலீஸாா் அவரிடமிருந்து 2 பவுன் தங்கச் சங்கிலி, இரு சக்கர வாகனம் ஆகியவற்றை பறிமுதல் செய்தனா்.