வெடிகுண்டு வீசி இளைஞரைக் கொல்ல முயற்சி: சிறுவன் உள்பட 4 போ் கைது

திருவண்ணாமலை: திருவண்ணாமலை அருகே நாட்டு வெடிகுண்டுகளை வீசி இளைஞரைக் கொல்ல முயன்ாக, 16 வயது சிறுவன் உள்பட 4 பேரை போலீஸாா் கைது செய்தனா்.

திருவண்ணாமலை-தண்டராம்பட்டு சாலை, நல்லவன்பாளையம் பகுதியில் இருந்து சாவல்பூண்டி கிராமத்துக்குச் செல்லும் சாலையில் சில தினங்களுக்கு முன்பு இரவு நேரத்தில் பயங்கர வெடி சப்தம் கேட்டது.

இதனால் அந்தப் பகுதியே புகை மண்டலமாக மாறியது. அதிா்ச்சியடைந்த பொதுமக்கள் சென்று பாா்த்தபோது வெடித்துச் சிதறிய நிலையில் 2 நாட்டு வெடிகுண்டுகள் இருந்தன. இதுகுறித்து போலீஸாருக்கு பொதுமக்கள் தகவல் கொடுத்தனா்.

திருவண்ணாமலை நகர டிஎஸ்பி ரவிச்சந்திரன் தலைமையிலான போலீஸாா் சென்று விசாரித்தனா். தடயவியல் நிபுணா்கள் வந்து சிதறிக்கிடந்த நாட்டு வெடிகுண்டுகளை கைப்பற்றி விசாரித்தனா். இதற்கிடையே, நல்லவன்பாளையம் பகுதியைச் சோ்ந்த மணிகண்டன் (40) முன்விரோதம் காரணமாக தன் மீது 4 போ் கொண்ட கும்பல் நாட்டு வெடிகுண்டுகளை வீசி கொல்ல முயன்ாக போலீஸில் புகாா் கொடுத்தாா்.

இதுகுறித்து திருவண்ணாமலை மேற்கு காவல் நிலைய போலீஸாா் வழக்குப் பதிந்து விசாரித்தனா். விசாரணையில், முன்விரோதம் காரணமாக மணிகண்டன் பைக்கில் சென்றபோது அவா் மீது நாட்டு வெடிகுண்டுகளை வீசி கொல்ல முயன்றதும், வெடிகுண்டுகள் கீழே விழுந்ததால் மணிகண்டன் உயிா் தப்பியதும் தெரியவந்தது.

இதையடுத்து, கீழ்செட்டிப்பட்டி கிராமம் அருண்குமாா் (42), இவரது நண்பா்களான சென்னையைச் சோ்ந்த தீபன் (19), தினேஷ் (19), திருவண்ணாமலையைச் சோ்ந்த 16 வயது சிறுவன் உள்பட 4 பேரை திங்கள்கிழமை இரவு போலீஸாா் கைது செய்தனா்.