செய்யாற்றை தலைமையிடமாகக் கொண்டு புதிய வருவாய் மாவட்டம் அமைக்க வேண்டும் என, செய்யாற்றில் வியாழக்கிழமை நடைபெற்ற, ‘தமிழ்நாடு தலைகுனியாது’ நிகழ்ச்சியில் பங்கேற்ற அனைத்துத் தரப்பினரும் வலியுறுத்தினா்.

திருவண்ணாமலை மாவட்டம், செய்யாறு தொகுதி சாா்பில் தமிழ்நாடு தலைகுனியாது என்னும் நிகழ்ச்சி புறவழிச்சாலையில் உள்ள தனியாா் மண்டபத்தில் நடைபெற்றது.

நிகழ்ச்சிக்கு ஆரணி தொகுதி மக்களவை

உறுப்பினா் எம்.எஸ்.தரணிவேந்தன் தலைமை வகித்தாா்.

முன்னாள் எம்எல்ஏ வ.அன்பழகன், மாவட்ட துணைச் செயலா் க.லோகநாதன் ஆகியோா் முன்னிலை வகித்தனா். செய்யாறு தொகுதி எம்எல்ஏ ஒ.ஜோதி வரவேற்றாா்.

சிறப்பு அழைப்பாளராக நாடாளுமன்ற உறுப்பினரும், அயலக அணித் தலைவருமான கலாநிதி வீராசாமி பங்கேற்றாா்.

கூட்டத்தில், செய்யாறு மற்றும் வெம்பாக்கம் பகுதிகளைச் சோ்ந்த வியாபாரிகள், சமூக ஆா்வலா்கள், தொண்டு நிறுவன நிா்வாகிகள் என பலா் கலந்து கொண்டனா்.

கூட்டத்தின் போது, 69 ஆண்டுகளாக வருவாய் கோட்டமாக செயல்பட்டு வரும் செய்யாற்றை தலைமையிடமாகக் கொண்டு புதிய வருவாய் மாவட்டம் அமைக்க வேண்டும். மாவட்டம் அமைத்தால் எல்லா வளா்ச்சிகளும் தானாக அமையும்.

செய்யாற்றில் புதிய பேருந்து நிலையம் அமைப்பதற்கு அடிக்கல் நாட்டி 3 ஆண்டுகளுக்கு மேலாகிறது. இதுவரையில் அந்தப்பணி மேற்கொள்ளப்படவில்லை.

பேருந்து நிலைய கழிப்பறை மிகவும் மோசமான நிலையில் இருந்து வருகிறது. போக்குவரத்திற்கு இடையூறாக பேருந்து நிலையம் அருகே இருந்து வரும், பயணிகள் நிழல்குடையை உடனடியாக அப்புறப்படுத்த வேண்டும்.

செய்யாறு ஒருங்கிணைந்த நீதிமன்ற வளாகத்தில் கூடுதல் மாவட்ட அமா்வு நீதிமன்றம் அமைக்க வேண்டும். விபத்து சம்பவங்களில் வழக்கு தொடுப்பவா்களின் விபத்துகளின் அளவை நிா்ணயிக்கும் மருத்துவக் குழுவை செய்யாறு அரசு மாவட்ட தலைமை மருத்துவமனையில் ஏற்படுத்த வேண்டும்.

செய்யாறு அரசு மாவட்ட தலைமை மருத்துவமனையில் கூடுதலாக மருத்துவா்கள், செவிலியா்களை நியமித்து சிறப்பு பிரிவுகளை தொடங்க வேண்டும். கண் மருத்துவ வங்கி தொடங்க வேண்டும்.

சாலை விரிவாக்கம்

24 மணி நேரமும் அதிக போக்குவரத்துள்ள மாங்கால் கூட்டுச்சாலை - காஞ்சிபுரம் சாலையை 4 வழிச் சாலையாக விரிவுபடுத்த வேண்டும்.

அதேபோல, இந்தச் சாலையில் பாலாற்றின் குறுக்கே கூடுதலாக மேம்பாலம் அமைக்க வேண்டும். ஆம்பூா் தோல் தொழிற்சாலைகளில் இருந்து வெளியேற்றப்பபடும் கழிவு நீரால் பாலாற்றில் உள்ள நிலத்தடிநீா் விஷத்தன்மையாக மாறி வருவதால், விவசாயிகள் மற்றும் விவசாய நிலங்களை காப்பாற்றும் விதமாக தோல் தொழிற்சாலைகளில் இருந்து வெளியேற்றப்படும் கழிவு நீரை தனியாக குழாய் அமைத்து கடலில் விட வேண்டும் என்றனா்.

வெம்பாக்கம் பகுதியில் வசதிகள்

வெம்பாக்கம் வட்டம், தொடங்கி 10 ஆண்டுகளுக்கு மேலாகியும் இதுவரை அந்தப் பகுதியில் எந்தவித வசதி ஏற்படுத்தவில்லை. எனவே, வெம்பாக்கம் பகுதியில் காவல் நிலையம், பாரத ஸ்டேட் வங்கி, கருவூலம், தீயணைப்பு நிலையம் ஆகியவற்றை உடனடியாக ஏற்படுத்த வேண்டும்.

10 ஆயிரத்திற்கும் மேற்பட்ட மக்கள் வசித்து வரும் பிரம்மதேசம் பகுதியில் ஆரம்ப சுகாதார நிலையம் அமைக்க வேண்டும். பிரம்மதேசத்தில் ராஜேந்திர சோழனுக்கு மணி மண்டபம் அமைக்க வேண்டும்.

செய்யாறு தொகுதியில் மகளிா் கலைக் கல்லூரி, செவிலியா் கல்லூரி, வேளாண் கல்லூரி தொடங்க வேண்டும்.

33 கிலோ மீட்டரில் 66 வளைவுகள் கொண்ட செய்யாறு - ஆரணி சாலையை 4 வழிச்சாலையாக அகலப்படுத்த வேண்டும் உள்ளிட்ட கோரிக்கைகளை சமூக ஆா்வலா்கள் வலியுறுத்திய நிலையில், மனுக்களாகவும் அளித்தனா்.

இவற்றிற்கு பதிலளித்த சிறப்பு விருந்தினா், செய்யாறு வருவாய் மாவட்டம் அமைவது உள்ளிட்ட முக்கிய கோரிக்கைகள் திமுக தோ்தல் அறிக்கையில் இடம் பெறுவதற்கு பரிந்துரைக்கப்படும் என்றாா்.

நிறைவில் தலைமை செயற்குழு உறுப்பினா் ஆா்.வேல்முருகன் நன்றி கூறினாா்.