வீட்டு வசதி வாரியத்தில் வீடுகள், அடுக்குமாடி குடியிருப்புகள் ஒதுக்கீடு பெற்று தவணை செலுத்தத் தவறியவர்களுக்கு சிறப்புச் சலுகை அளிக்கப்பட்டுள்ளது.
இதுகுறித்து, வீட்டுவசதி வாரியத்தின் வேலூர் பிரிவு செயற்பொறியாளர் விடுத்துள்ள செய்திக் குறிப்பு: 
தமிழ்நாடு வீட்டுவசதி வாரியத்தின் வேலூர் வீட்டுவசதி பிரிவு சார்பில், மனைகள், வீடுகள், அடுக்குமாடி குடியிருப்புகளுக்கான ஒதுக்கீடு பெற்றவர்கள் மாதாந்திர தவணை செலுத்தத் தவறியதற்கான அபராத வட்டி, அசல் மீதான வட்டி முழுவதுமாகவும், நிலத்தின் இறுதிவிலை வித்தியாசத்தின் மீதான வட்டியை வருடத்துக்கு 5 மாதம் மட்டும் கணக்கிட்டு தள்ளுபடி செய்து அரசாணை வழங்கப்பட்டுள்ளது.
 இந்த சலுகை மூலம் இதுவரை விற்பனை பத்திரம் பெறாத ஒதுக்கீடுதாரர்கள் இந்த சிறப்புச் சலுகையைப் பயன்படுத்தி வரும் ஆகஸ்ட் 26-ஆம் தேதிக்குள் நிலுவைத் தொகை முழுவதும் ஒரே தவணையாக செலுத்தி தங்களுக்கு ஒதுக்கீடு செய்யப்பட்ட அலகுகளுக்கு கிரையப்பத்திரம் பெற்று பயனடைய வேண்டும். இந்த சலுகை வாலாஜா புறநகர் திட்டம் பகுதி 2 மனைகள், சுயநிதித் திட்டங்கள், ஏல மனைகள், ரத்து செய்யப்பட்ட இனங்களுக்கு பொருந்தாது.
மேலும் விவரங்களுக்கு 0416-2252561 என்ற தொலைபேசி எண்ணில் தொடர்பு கொள்ளலாம்.