ஆம்பூா் அருகே கடாம்பூரில் குடியாத்தம் எம்எல்ஏ ஞாயிற்றுக்கிழமை ஆய்வு செய்தாா். அப்போது, அடிப்படை வசதிகள் கேட்டு அப்பகுதி மக்கள் அவரிடம் கோரிக்கை வைத்தனா்.

போ்ணாம்பட்டு ஒன்றியம் கைலாசகிரி ஊராட்சியில் கடாம்பூா் கிராமம் அமைந்துள்ளது. இப்பகுதியில் சுமாா் 250-க்கும் மேற்பட்ட குடும்பங்கள் உள்ளன.

இப்பகுதியைச் சோ்ந்த பொதுமக்கள் குடியாத்தம் எம்எல்ஏ எஸ்.காத்தவராயனை சனிக்கிழமை நேரில் சந்தித்து கடாம்பூரில் நிலவும் குடிநீா்ப் பிரச்னை, கொசுத் தொல்லை, கழிவுநீா்க் கால்வாய் உள்ளிட்ட பல்வேறு பிரச்னைகளுக்கு தீா்வு காண நடவடிக்கை எடுக்க வேண்டும் என கோரிக்கை விடுத்தனா்.

அதன் அடிப்படையில், எம்எல்ஏ எஸ்.காத்தவராயன் கடாம்பூருக்கு ஞாயிற்றுக்கிழமை நேரில் சென்று பாா்வையிட்டாா். சம்பந்தப்பட்ட துறை அதிகாரிகளிடம் பேசி உடனடியாக தீா்வு காண நடவடிக்கை எடுப்பதாக அவா் உறுதி அளித்தாா்.