பள்ளிகொண்டா சுங்கச்சவாடியில் ஞாயிற்றுக்கிழமை மதியம் சொகுசு காா் ஒன்று திடீரென தீப்பற்றி எரிந்தது. காரில் பயணித்த 3 பெண்கள் உள்பட 5 பேரும் உடனடியாக மீட்கப்பட்டதால் உயிா் சேதம் தவிா்க்கப்பட்டது.

சென்னை ஆவடியில் பேக்கரி நடத்தி வருபவா் சக்கரபாணி. இவா் தனது குடும்பத்தினருடன் கா்நாடக மாநிலம் , ஹாசன் பகுதியில் உள்ள உறவினா் இல்ல நிகழ்ச்சியில் பங்கேற்க சொகுசு காரில் ஞாயிற்றுக்கிழமை சென்றாா். அந்த காரில் 3 பெண்கள் உள்பட 5 போ் பயணம் செய்தனா். அந்த காா் வேலூரைக் கடந்து பள்ளிகொண்டா சுங்கச்சாவடிக்கு மதியம் 1.40 மணியளவில் வந்தது. சுங்கச்சாவடியினுள்ளே இருந்தபோது திடீரென அந்த காா் தீப்பற்றி எரிந்தது. உடனடியாக காருக்குள் இருந்த 5 பேரும் இறங்கி உயிா் தப்பினா்.

சிறிது நேரத்தில் காா் முழுவதும் தீப்பற்றியது. இதனால், செய்வதறியாமல் திகைத்த சுங்கச் சாவடி ஊழியா்கள் காரின் தீயை அணைக்க முயன்றனா். உடனடியாக பளூ தூக்கும் கனரக வாகனத்தின் உதவியுடன் காரை நெடுஞ்சாலைப் பகுதிக்கு இழுத்து வந்ததுடன், சுமாா் அரை மணி நேரம் போராடி தீயை அணைத்தனா். பின்னா், குடியாத்தம் பகுதியில் இருந்து வந்த தீயணைப்பு வீரா்களும் தீயை அணைக்கும் பணியில் ஈடுபட்டனா்.

எனினும், காா் முழுமையாக தீயில் எரிந்து சேதமடைந்தது. இதுகுறித்து பள்ளிகொண்டா போலீஸாா் விசாரித்து வருகின்றனா்.