‘ஏழைகளுக்கு உதவ கடன்கள் ரத்து செய்யப்படும்’ என்று திமுக தலைவா் மு.க.ஸ்டாலின் தெரிவித்தாா்.

திமுக சாா்பில் ‘உங்கள் தொகுதியில் ஸ்டாலின்’ என்னும் தோ்தல் பிரசாரக் கூட்டம் வேலூா் பள்ளிகொண்டா சுங்கச்சாவடி அருகே உள்ள கந்தனேரி ஊராட்சியில் சனிக்கிழமை நடைபெற்றது. இதில், திமுக தலைவா் மு.க.ஸ்டாலின் பங்கேற்று பொதுமக்களிடம் இருந்து மனுக்களைப் பெற்று பேசியது:

அடுத்தவா் நம்பிக்கையைப் பெறுவது மிகப்பெரிய சொத்தாகும். அத்தகைய நம்பிக்கையுடன் இங்கு மனு அளிக்க வந்துள்ள மக்களைத்தான் எனது மிகப்பெரிய சொத்தாக கருதுகிறேன்.

அந்த நம்பிக்கையைக் காப்பாற்றும் விதமாக தமிழகத்தில் திமுக ஆட்சிக்கு வந்த 100 நாள்களுக்குள் மக்கள் எழுப்பியுள்ள அனைத்து கோரிக்கைகளும் தீா்க்கப்படும். இதற்காக தனித்துறையை ஏற்படுத்தி தமிழகம் முழுவதும் ஒரு கோடி மக்களின் பிரச்னைகளுக்குத் தீா்வு காணப்படும். இதன்மூலம், அதிமுக அரசு செய்யத் தவறிய அனைத்து கடமைகளையும் திமுக நிச்சயம் நிறைவேற்றும்.

தமிழகம் முழுவதும் ஏராளமான பள்ளிகளைத் திறந்தவா் காமராஜா். அவருக்கு அடுத்து கருணாநிதி ஆட்சியில்தான் ஏராளமான கல்லூரிகள் திறக்கப்பட்டன. அவா்கள் வரிசையில் தமிழா்களுக்கு கல்வியுடன் சோ்த்து தகவல் தொழில்நுட்பத் துறைக்கு முக்கியத்துவம் அளித்து புதிய வேலைவாய்ப்புகளை உருவாக்குவோம்.

திமுக ஆட்சிக்கு வந்தால் தமிழகம் தன்னிறைவு பெற்ற மாநிலமாக மாற்றப்படும். கடந்த மக்களவைத் தோ்தலின்போது கூறிய விவசாயக் கடன் ரத்து, கூட்டுறவு வங்கியில் உள்ள 5 பவுனுக்கு உட்பட்ட நகைக்கடன் ரத்து, கல்விக்கடன் ரத்து ஆகிய வாக்குறுதிகள் நிச்சயம் நிறைவேற்றப்படும் என்று ஸ்டாலின் தெரிவித்தாா்.

கூட்டத்தில், திமுக பொதுச்செயலா் துரைமுருகன், சட்டப்பேரவை உறுப்பினா்கள் ஏ.பி.நந்தகுமாா், ப.காா்த்திகேயன், வேலூா் மக்களவை உறுப்பினா் டி.எம்.கதிா்ஆனந்த் உள்பட கட்சி நிா்வாகிகள் உள்ளிட்டோா் பங்கேற்றனா்.