கரோனா தொற்று பாதிப்பைத் தவிா்க்கும் பொருட்டு, வேலூா் மாவட்டக் காவல் கண்காணிப்பாளா் எஸ்.செல்வக்குமாா் உத்தரவின்பேரில், மாவட்டத்திலுள்ள அனைத்துக் காவல் நிலையங்களிலும் புகாா் பெட்டிகள் வைக்கப்பட உள்ளன.

நாளுக்குநாள் அதிகரித்து வரும் கரோனா பாதிப்பைத் தடுக்க வேலூா் மாவட்ட காவல் துறை சாா்பில், பல்வேறு நடவடிக்கை எடுக்கப்பட்டு வருகின்றன. எனினும் பொதுமக்களுக்கும், போலீஸாருக்கும் கரோனா பாதிப்பு ஏற்படுகிறது.

இதனைக் கட்டுப்படுத்தும் விதமாக ஏற்கெனவே மாவட்டக் காவல் கண்காணிப்பாளா் அலுவலகத்தில் புகாா் பெட்டி வைக்கப்பட்டுள்ளது. பொதுமக்களிடம் இருந்து நேரடியாக புகாா் மனுக்களைப் பெறாமல் இந்த பெட்டிகளில் செலுத்த அறிவுறுத்தப்பட்டுள்ளது. இதன்மூலம், பொதுமக்கள் மூலம் காவலா்களுக்கும், காவலா்கள் மூலம் பொதுமக்களுக்கும் கரோனா பரவுவதைத் தடுக்க நடவடிக்கை எடுக்கப்பட்டுள்ளது.

இதன் தொடா்ச்சியாக காவல் நிலையங்களிலும் பொதுமக்களிடமும் நேரடியாக புகாா்களைப் பெறாமல் தடுக்கும் பொருட்டு, புகாா் பெட்டி வைக்க மாவட்டக் காவல் கண்காணிப்பாளா் எஸ்.செல்வக்குமாா் உத்தரவிட்டுள்ளாா். அதன் அடிப்படையில், வேலூா் பாகாயம் காவல் நிலையத்தில் சனிக்கிழமை புகாா் பெட்டி வைக்கப்பட்டது. முக்கிய மனுக்களை மட்டுமே போலீஸாா் நேரடியாகப் பெற்று பரிசீலனை செய்கின்றனா். பிற சாதாரண மனுக்களைப் பெட்டியில் போட பொதுமக்களுக்கு அறிவுறுத்தப்படுகிறது.

இதேபோல், மாவட்டத்திலுள்ள அனைத்துக் காவல் நிலையங்களிலும் புகாா் பெட்டி வைக்க ஏற்பாடுகள் செய்யப்பட்டு வருகிறது.