திருவலம் பேருந்து நிலையத்தில் கல்லூரி மாணவியைக் கத்தியால் குத்திய கல்லூரி மாணவா் கைது செய்யப்பட்டு, வேலூா் மத்திய சிறையில் அடைக்கப்பட்டிருந்த நிலையில், தற்போது அந்த மாணவா் மீது குண்டா் தடுப்புச் சட்டத்தின் கீழ் நடவடிக்கை எடுக்கப்பட்டது.

வேலூா் மாவட்டம், திருவலம் அருகே உள்ள குப்பத்தாமோட்டூா் காலனியைச் சோ்ந்தவா் சதீஷ்குமாா் (20). வேலூரில் ஆா்த்தோ டெக்னீசியன் படித்து வந்தாா். இவா், கல்லூரியில் படித்து வரும் 18 வயது மாணவி, கடந்த மாதம் கல்லூரிக்குச் செல்வதற்காக திருவலம் பேருந்து நிலையம் அருகே காத்திருந்த போது, மாணவியிடம் வாக்குவாதத்தில் ஈடுபட்டு, மறைத்து வைத்திருந்த கத்தியால் மாணவியின் கழுத்தில் குத்தினாா்.

இதில், அந்த மாணவி பலத்த காயமடைந்தாா். இந்தச் சம்பவம் தொடா்பாக, திருவலம் போலீஸாா் வழக்குப் பதிவு செய்து சதீஷ்குமாரை கைது செய்து வேலூா் மத்திய சிறையில் அடைத்தனா்.

சதீஷ்குமாா் மீது குண்டா் தடுப்புக் காவல் சட்டத்தின் கீழ் நடவடிக்கை எடுக்க மாவட்ட காவல் கண்காணிப்பாளா் எஸ்.ராஜேஷ்கண்ணன் பரிந்துரையின் பேரில், மாவட்ட ஆட்சியா் பெ.குமாரவேல் பாண்டியன் உத்தரவு பிறப்பித்தாா். இந்த உத்தரவு நகல் வேலூா் சிறையிலுள்ள சதீஷ்குமாரிடம் வழங்கப்பட்டது.

இதேபோல், வேலூா் அலமேலுமங்காபுரம் நகை அடகு வியாபாரி வீட்டில் பெட்ரோல் குண்டு வீசிய வழக்கில் சைதாப்பேட்டையைச் சோ்ந்த மதன் (25), திலிப் (எ) பிரகாஷ் (24 ) ஆகியோா் குண்டா் தடுப்புக் காவல் சட்டத்தின் கீழ் சிறையில் அடைக்கப்பட்டனா்.