தோ்தல் விதிகளை மீறியதாக பாஜக தேசிய மகளிரணி தலைவரும், சட்டப் பேரவை உறுப்பினருமான வானதி சீனிவாசன் மீது தொடுக்கப்பட்ட வழக்கில் அவா் வியாழக்கிழமை விடுதலை செய்யப்பட்டாா்.

கோவையில் கடந்த 2016-ஆம் ஆண்டு நடைபெற்ற சட்டப் பேரவைத் தோ்தலின்போது தாமரைச் சின்னத்தில் பாஜக சாா்பில் வானதி சீனிவாசன் போட்டியிட்டாா்.

அப்போது, சித்தாபுதூா் பகுதியில் உள்ள ஐயப்பன் கோயிலில் பக்தா்களிடம் பாஜகவுக்கு ஆதரவாக தாமரை சின்னத்தில் வாக்களிக்க கோரியதாகவும், கட்சியின் சின்னம் மற்றும் வேட்பாளரின் புகைப்படம் அடங்கிய துண்டுப் பிரசுரங்கள் விநியோகம் செய்ததாகவும், இது தோ்தல் விதிமீறல் என்றும் வானதி சீனிவாசன் மீது வழக்குத் தொடுக்கப்பட்டது.

இந்த வழக்கு கோவை ஒருங்கிணைந்த நீதிமன்றத்தில் உள்ள சட்டப் பேரவை உறுப்பினா்களுக்கு எதிரான வழக்குகளை விசாரிக்கும் சிறப்பு நீதிமன்றத்தில் நடைபெற்று வந்தது.

இந்நிலையில், வானதி சீனிவாசன் மீதான குற்றச்சாட்டு அரசுத் தரப்பில் நிரூபிக்கப்படவில்லை எனக்கூறி இந்த வழக்கிலிருந்து அவரை விடுதலை செய்து முதலாவது குற்றவியல் நீதித் துறை நடுவா் நீதிமன்ற நீதிபதியும், சிறப்பு நீதிமன்ற (பொறுப்பு) நீதிபதியுமான தமிழ் இனியன் வியாழக்கிழமை தீா்ப்பளித்தாா்.