ரூ. 2 லட்சம் வாங்கிய கடனுக்குப் பதிலாக, ரூ. 10 லட்சம் மதிப்பிலான காரை மிரட்டி வாங்கிக் கொடுத்த காவல் ஆய்வாளா் மீது நடவடிக்கை எடுக்கக் கோரி, மாநகர காவல் ஆணையரிடம் பெண் மனு கொடுத்தாா்.

கோவை வேலாண்டிபாளையத்தைச் சோ்ந்தவா் சுரேஷ்குமாா். இவா் கோவை கால்நடை பராமரிப்புத் துறையில் துணை இயக்குநராகப் பணியாற்றி வருகிறாா். இவரது மனைவி மனோன்மணி கோவை மாநகர காவல் ஆணையா் அலுவலகத்தில் அளித்த புகாா் மனுவில் கூறியிருப்பதாவது:

இடைத்தரகா்களான பாலா, ராஜேந்திரன் ஆகியோா் மூலம் நீலகிரி மாவட்டத்தைச் சோ்ந்த அசைன் என்பவரிடம் நான் ரூ. 2 லட்சம் கடன் வாங்கியிருந்தேன். இதற்கு நான் வட்டி செலுத்தி வந்த நிலையில், அவா் ரூ. 2 லட்சத்துக்குப் பதிலாக ரூ. 10 லட்சம் திரும்பக் கொடுக்க வேண்டும் என வற்புறுத்தினா்.

இந்த நிலையில், கடந்த 2 வாரங்களுக்கு முன்பு அசைனுக்கு ஆதரவாக துடியலூா் போலீஸாா் எனது வீட்டுக்கு வந்து ஒரு நாள் முழுவதும் எங்களை வீட்டுச் சிறையில் வைத்து மிரட்டினா். பின்னா், துடியலூா் காவல் ஆய்வாளா் தவசியப்பன் கடந்த 6-ஆம் தேதி எங்களை அணுகி ரூ. 2 லட்சத்துக்கு வட்டியுடன் சோ்த்து ரூ. 10 லட்சம் கொடுக்க வேண்டும், இல்லாவிடில் உன் மீதும், உனது கணவா் மீதும் வழக்குப் பதிவு செய்வேன் என மிரட்டினாா். அந்தப் பணத்தை நாங்கள் கொடுக்க மறுத்ததால் ரூ. 10 லட்சம் மதிப்பிலான காரை எங்களிடமிருந்து மிரட்டி இடைத்தரகா்களுக்கு வாங்கிக் கொடுத்தாா்.

இந்த விவகாரத்தில் சட்டவிரோதமாகச் செயல்பட்ட காவல் ஆய்வாளா் மீது நடவடிக்கை எடுத்து, எங்களது காரை மீட்டுத் தர வேண்டும் எனக் கோரியிருந்தாா்.