கோவையைச் சேர்ந்த தென்னிந்திய பொறியியல் உற்பத்தியாளர்கள் சங்கத்துக்கு (சீமா) தேசிய அளவிலான தர அங்கீகாரம் வழங்கப்பட்டுள்ளது.
 இதுகுறித்து அந்த சங்கத்தின் தலைவர் கே.கே.ராஜன் வெளியிட்டுள்ள செய்திக் குறிப்பு:
 இந்திய தர நிர்ணயக் குழுவின் துணை நிறுவனமான தேசிய கல்வி, பயிற்சி அங்கீகார சான்றளிப்பு நிறுவனம்,  மத்திய அரசின் வர்த்தக தொழில் துறை, தொழிலாளர்,  வேலைவாய்ப்புத் துறை உள்ளிட்ட அமைச்சகங்களின் துணையுடன் செயல்பட்டு வருகிறது. இந்த நிறுவனத்தின் சார்பில் வர்த்தக, தொழில் அமைப்புகளுக்கு சிறந்த அங்கத்தினர்களைக் கொண்ட நிறுவனங்களுக்கான தர அங்கீகாரத்தை, வெள்ளி, தங்கம், வைரம் என்ற பிரிவுகளில் வழங்கி வருகிறது.
 நிறுவனங்களுக்கான திட்டம், செயல்பாடு, சேவைகள் ஆகியவற்றின் அடிப்படையில் இந்த சான்று வழங்கப்படுகிறது. இந்நிலையில், தென்னிந்திய பொறியியல் உற்பத்தியாளர்கள் சங்கத்துக்கு தங்கத் தர அங்கீகாரம் வழங்குவதாக தேசிய கல்வி, பயிற்சிக்கு அங்கீகாரம் வழங்கும் நிறுவனம் அறிவித்துள்ளது. இந்த அங்கீகாரம் அடுத்த 3 ஆண்டுகளுக்கு செல்லுபடியாகும்.
 இதன் மூலம், சீமாவுக்கு தரம், தகுதிக்கான ஹால்மார்க் குறியீடு, வெளிநாட்டு வர்த்தக முகவர்களுடன் இணைப்பு உருவாக்கம், குறைந்த வட்டி விகிதத்தில் உறுப்பினர்களுக்கு கடன் கிடைப்பது உள்ளிட்ட பல சலுகைகள் கிடைக்க இருப்பதாக ராஜன் மேலும் தெரிவித்துள்ளார்.