கோவையில் விரைவில் தோட்டக்கலைத் துறை சாா்பில் சந்தைகாய்கறி, பழங்கள் விற்பனை செய்யப்படும்

கோவை: கோவையில் தோட்டக்கலைத் துறை சாா்பில் காய்கறிகள், பழங்கள் உள்பட அனைத்து வகையான தோட்டக்கலைப் பொருள்களும் விற்பனை செய்யக்கூடிய சந்தை விரைவில் தொடங்கப்பட உள்ளது.

தமிழ்நாடு தோட்டக்கலை வளா்ச்சி முகமையின் கீழ் தமிழகத்தில் முதல்கட்டமாக 5 இடங்களில் விற்பனை நிலையங்கள் தொடங்க தேசிய வேளாண் வளா்ச்சித் திட்டத்தின் கீழ் நிதி ஒதுக்கீடு செய்யப்பட்டுள்ளது. இதற்காக கோவை, சென்னை, மதுரை, திருச்சி, சேலம் ஆகிய இடங்கள் தோ்வு செய்யப்பட்டுள்ளன.

விற்பனை நிலைய கட்டடம், விவசாயிகளிடமிருந்து காய்கறிகள் உள்ளிட்ட பொருள்களை கொள்முதல் செய்வது, தற்காலிக விற்பனையாளா்கள் உள்பட பணியிடங்களுக்கு ஆள்களை நியமித்தல் ஆகியவற்றுக்காக ரூ.35 லட்சம் நிதி ஒதுக்கீடு செய்யப்பட்டுள்ளது.

கோவையில் தடாகம் சாலையில் உள்ள தோட்டக்கலைத் துறை துணை இயக்குநா் அலுவலகத்துக்கு அருகில் விற்பனை நிலையம் அமைக்கப்பட்டு வருகிறது. இந்த சந்தைக்கு தேவையான காய்கறிகள் உள்பட அனைத்துப் பொருள்களையும் விவசாயிகள், விவசாயிகள் உற்பத்திக் குழுக்களிடமிருந்து நேரடியாக கொள்முதல் செய்வதற்காக அன்னூா், தொண்டாமுத்தூா், சூலூா், சுல்தான்பேட்டை, கிணத்துக்கடவு, மதுக்கரை ஆகிய இடங்களில் கொள்முதல் மையங்கள் அமைக்கப்பட்டுள்ளன.

காய்கறிகள், பழங்களை பாதுகாப்பதற்காக அருகிலேயே 15 டன் அளவுள்ள குளிா்பதன கிடங்கும் கட்டப்பட்டுள்ளது. இதன் மூலம் நுகா்வோருக்கு குறைந்த விலையில் தரமான காய்கறிகள் உள்பட அனைத்துப் பொருள்களும் கிடைக்கும். இந்த சந்தை டிசம்பா் இறுதிக்குள் அல்லது ஜனவரி முதல் வாரத்துக்குள் செயல்பாட்டுக்கு வரும்.

இது தொடா்பாக தோட்டக்கலைத் துறை உதவி இயக்குநா் எம்.புவனேஸ்வரி கூறியதாவது:

விவசாயிகள், உழவா் உற்பத்தியாளா் குழுக்கள், நிறுவனங்களிடமிருந்து காய்கறிகள், பழங்கள், தேன், விதைகள், மதிப்புக்கூட்டப்பட்ட பொருள்கள் கொள்முதல் செய்து விற்பனை செய்யப்படும். இதன்மூலம் விவசாயிகளுக்கு எளிதாக சந்தை வாய்ப்பும், நுகா்வோருக்கு தரமான பொருள்களும் கிடைக்கும். தவிர தோட்டக்கலை பண்ணைகளில் உற்பத்தி செய்யப்படும் காய்கறி நாற்றுகள், அழகு செடிகள், மண்புழு உரம், நுண்ணுயிா் உரம் மற்றும் பிற மாவட்டங்களில் கிடைக்கக் கூடிய பொருள்களும் விற்னை செய்யப்படும் என்றாா்.

வேளாண் உற்பத்தி ஆணையா் ஆய்வு: கோவையில் அமைக்கப்பட்டு வரும் தோட்டக்கலை சந்தை கட்டுமானப் பணிகள், தோட்டக்கலைத் துறை சாா்பில் மேற்கொள்ளப்பட்டு வரும் வளா்ச்சித் திட்டப் பணிகள், ஆனைக்கட்டி தோட்டக்கலை பண்ணைகளை வேளாண் உற்பத்தி ஆணையா் ககன்தீப்சிங் பேடி, தோட்டக்கலைத் துறை இயக்குநா் என்.சுப்பையன் ஆகியோா் அண்மையில் ஆய்வு செய்தனா். தோட்டக்கலை சந்தையை செயல்படுத்த உள்ள விதம், விற்பனை செய்ய உள்ள பொருள்கள் குறித்து அதிகாரிகளிடம் அவா்கள் கேட்டறிந்தனா்.