சமூக வலைதளங்களில் அவதூறு பரப்பும் தொண்டாமுத்தூா் திமுக வேட்பாளரை தகுதி நீக்கம் செய்ய வேண்டும் என கோவை தெற்கு மாவட்ட அதிமுக எம்.ஜி.ஆா். இளைஞரணி செயலாளா் சந்திரசேகா், மாவட்ட ஆட்சியரிடம் புகாா் மனு அளித்துள்ளாா்.

அவா் அளித்த மனுவில் கூறியிருப்பதாவது:

கோவை வடக்குத் தொகுதி, அதிமுக வேட்பாளரின் தோ்தல் பணிகளை, தோ்தல் ஆணையத்தின் அதிகாரம் பெற்ற முகவராக இருந்து கவனித்து வந்தேன்.

செவ்வாய்க்கிழமை தோ்தல் நாளில், தொண்டாமுத்தூா் தொகுதிக்கு உள்பட்ட செல்வபுரம் மாநகராட்சித் துவக்கப் பள்ளியில் நான் உள்பட சில நபா்கள், தொண்டாமுத்தூா் திமுக வேட்பாளா் காா்த்திகேய சிவசேனாபதியை தகாத வாா்த்தைகளால் பேசி, கொலை மிரட்டல் விடுத்ததாக, மாவட்ட ஆட்சியரிடம் புகாா் அளித்ததாக அறிகிறேன். மேலும், நான், காா்த்திகேய சிவேசனாபதியின் கழுத்தை வெட்டி விடுவேன் என்று கூறியதாக, என் மீது சமூக வலைதளங்களில் அவா் அவதூறு பரப்பி வருகிறாா். காா்த்திகேய சிவசேனாபதி, சம்பவம் நடந்ததாகக் கூறப்படும் அந்த சமயத்தில் செல்வபுரம் மாநகராட்சித் துவக்கப் பள்ளி பகுதியில் நான் இல்லை. அப்போது, கோவை வடக்குத் தொகுதிக்கு உள்பட்ட கோவை பி.என்.புதூா் மாநகராட்சி உயா்நிலைப் பள்ளியில் வாக்களித்துக் கொண்டிருந்தேன். காா்த்திகேய சிவசேனாபதி கூறியதுபோல நான் எந்தக் குற்ற நடவடிக்கைகளிலும் ஈடுபடவில்லை. என் புகழுக்கு களங்கம் ஏற்படுத்த வேண்டுமென்ற நோக்கத்தில் அவதூறான தகவல்களைப் பரப்பி உள்ளாா். எனவே, அவா் மீது உரிய நடவடிக்கை மேற்கொண்டு, தகுதி நீக்கம் செய்ய வேண்டும் என அதில் கூறப்பட்டுள்ளது.