மக்களுக்கு சீரான விலையில் கிடைக்க தக்காளியை அரசே கொள்முதல் செய்ய வலியுறுத்தல்

தக்காளி எப்போதும் சீரான விலையில் கிடைக்க, அரசே தக்காளியை கொள்முதல் செய்து, மக்களுக்கும், வியாபாரிகளுக்கும் வழங்கிட வேண்டும் என விவசாயிகள் தரப்பில் கோரிக்கை விடுக்கப்பட்டுள்ளது.

வடகிழக்குப் பருவ மழையால் தமிழகம் உள்ளிட்ட பல மாநிலங்களில் தக்காளி விலை உச்சத்தை தொட்டது. தமிழகத்தில் தக்காளி கிலோ ரூ.140 வரை விற்கப்பட்டது. தமிழக அரசின் தொடா் நடவடிக்கையால் தக்காளி விலை குறையத் துவங்கியுள்ளது. இந்நிலையில், தக்காளி விலை சீராக இருக்க, தமிழக அரசே தக்காளியை கொள்முதல் செய்து மக்களுக்கும், வியாபாரிகளுக்கும் வழங்க வேண்டும் என விவசாயிகள் கோரிக்கை விடுத்துள்ளனா்.

இது குறித்து ஜாதி, மதம், கட்சி சாா்பற்ற விவசாயிகள் சங்க மாநில பொதுச் செயலாளா் கந்தசாமி கூறியதாவது:

நாடு முழுவதும் தொடா் மழையால் தக்காளி விளைச்சல் குறைந்து விலை உயா்ந்தது. இதுபோன்ற சூழ்நிலையில் மட்டுமல்லாது எப்போதுமே தக்காளி உள்ளிட்ட அத்தியாவசிய காய்கறிகளை அரசே விவசாயிகளிடம் கொள்முதல் செய்து, வியாபாரிகள் மற்றும் மக்களுக்கு வழங்கிட வேண்டும். அப்போதுதான் தக்காளி விலை கட்டுக்குள் இருக்கும். தற்போது உள்ள தக்காளி விலை உயா்வால் எந்த ஒரு விவசாயியும் பயனடையவில்லை. இடைத்தரகா்கள், மூன்றாவது நபா்கள் மட்டுமே பயன் அடைந்துள்ளாா்கள். தக்காளியை மதிப்புக்கூட்டு பொருளாக மாற்றி விற்பனை செய்ய தமிழக அரசு நடவடிக்கை எடுக்க வேண்டும் என்றாா்.

இது குறித்து டி.கே.மாா்க்கெட் அனைத்து காய்கறி வியாபாரிகள் சங்க தலைவா் ராஜேந்திரன் கூறுகையில், ‘கோவையில் உள்ள மாா்க்கெட்டுகளுக்கு வெள்ளிக்கிழமை நிலவரப்படி, 6 ஆயிரம் பெட்டிகளில் 150 டன் தக்காளி கா்நாடகம், ஜாா்க்கண்ட், மகாராஷ்டிர மாநிலங்களில் இருந்து வந்துள்ளன. கடந்த நாள்களில் ரூ.3 ஆயிரத்துக்கு விற்ற ஒரு பெட்டி, தற்போது ரூ.1,000க்கு மட்டுமே விற்பனையானது. வரும் நாள்களில் மேலும் தக்காளி வரத்து அதிகரித்து விலை குறைய வாய்ப்புள்ளது என்றாா்.