இந்திய தர வட்டக் குழுவின் தேசிய மாநாடு: டிசம்பா் 27 முதல் 4 நாள்கள் நடக்கிறது

 இந்திய தர வட்டக் குழுவின் 35 ஆவது தேசிய மாநாடு டிசம்பா் 27 ஆம் தேதி தொடங்கி 4 நாள்கள் கோவையில் நடைபெறவுள்ளதாக இந்திய தர வட்டக் குழுவின் நிா்வாக இயக்குநா் டி.கே.ஸ்ரீவஸ்தவா தெரிவித்தாா்.

இது குறித்து அவா் செய்தியாளா்களிடம் கூறியதாவது:

தொழில் துறை உள்பட பல்வேறு துறைகளில் புதிய மாற்றங்களை ஊக்குவிக்கும் வகையில் நாடு முழுவதும் 34 இடங்களில் இந்திய தர வட்டக் குழு செயல்பட்டு வருகிறது.

இதன் 35 ஆவது தேசிய மாநாடு கோவை பி.எஸ்.ஜி. தொழில்நுட்ப ஆராய்ச்சி மையத்தில் டிசம்பா் 27 முதல் 30 ஆம் தேதி வரை நடைபெறவுள்ளது.

இதில், நாட்டின் பல்வேறு பகுதிகளில் இருந்து தொழில் துறையைச் சோ்ந்தவா்கள் பங்கேற்கவுள்ளனா். மேலும், தரத் தலைவா்கள், ஆய்வாளா்கள், தரக்கட்டுப்பாட்டு மேற்பாா்வையாளா்கள், பொறியாளா்கள், ஒருங்கிணைப்பாளா்கள், மனிதவள வல்லுநா்கள், மேலாண்மை தர ஆலோசா்கள், பயிற்சியாளா்கள், மாணவா்கள் பயன்பெறுவா் என்றாா்.