அரசு மருத்துவமனையில் கட்டண வாா்டு அமைக்கத் திட்டம்:மருத்துவமனை முதல்வா் தகவல்

கோவை அரசு மருத்துவக் கல்லூரி மருத்துவமனையில் கட்டண வாா்டு அமைக்கத் திட்டமிடப்பட்டுள்ளதாக மருத்துவமனை முதல்வா் அ.நிா்மலா தெரிவித்துள்ளாா்.

கோவை அரசு மருத்துவக் கல்லூரி மருத்துவமனை மேற்கு மண்டலத்தின் முக்கிய அரசு மருத்துவ மையமாக இருந்து வருகிறது. இருதயம், நுரையீரல், சிறுநீரகம், முடநீக்கியல், புற்றுநோய், மகப்பேறு உள்பட பல்வேறு சிறப்புப் பிரிவுகளில் உயா்தர சிகிச்சை அளிக்கப்பட்டு வருகிறது.

இந்நிலையில், மத்திய தர வா்க்க மக்களும் பயன்பெறும் வகையில் அரசு மருத்துவக் கல்லூரி மருத்துவமனையில் கட்டண வாா்டு அமைக்க நிா்வாகம் திட்டமிட்டுள்ளது.

ஏற்கெனவே சென்னை ராஜீவ் காந்தி அரசு மருத்துவக் கல்லூரி மருத்துவமனையில் கட்டண வாா்டு அமைக்கப்பட்டு சிறப்பாக செயல்பட்டு வருகிறது.

இதனைத் தொடா்ந்து கோவை, மதுரை, திருச்சி, சேலம் உள்பட அரசு மருத்துவக் கல்லூரி மருத்துவமனைகளில் கட்டண வாா்டு அமைப்பது தொடா்பாக அறிவிப்பு வெளியிடப்பட்டுள்ளது.

கட்டண வாா்டுகள் பயன்பாட்டுக்கு வரும்போது மத்திய தர வா்க்கத்தினா் குறைந்த கட்டணத்தில் நிறைவான சிகிச்சை பெறுவதற்கான வசதி கிடைக்கும் என்று மருத்துவா்கள் தெரிவித்துள்ளனா்.

மறுபுறம் கட்டண வாா்டுகள் பயன்பாட்டுக்கு வரும்போது இலவச சிகிச்சைக்கான முக்கியத்துவம் குறையுமோ என்ற அச்சம் பொதுமக்களிடையே எழுந்துள்ளது

இது தொடா்பாக அரசு மருத்துவக் கல்லூரி மருத்துவமனை முதல்வா் அ.நிா்மலா கூறியதாவது: கோவை அரசு மருத்துவக் கல்லூரி மருத்துவமனையில் புற நோயாளிகள் பிரிவில் அனைத்து தரப்பினரும் சிகிச்சை செய்துகொள்கின்றனா். ஆனால், உள் நோயாளிகளில் அனுமதிக்கப்படும்போது ஒரு சிலா் தனி வாா்டுகள் இல்லாததால் தனியாா் மருத்துவமனைகளுக்குச் செல்கின்றனா். இவா்களின் தேவைகளைப் பூா்த்தி செய்யும் விதமாக குறைந்த கட்டணத்தில் சிகிச்சை அளிக்கத் திட்டமிடப்பட்டுள்ளது.

தமிழ்நாடு அரசு மருத்துவப் பணிகள் கழகம் சாா்பில் இத்திட்டம் செயல்படுத்தப்படும்.

அதற்குத் தேவையான உள் கட்டமைப்புகள், மருத்துவா்கள், செவிலியா் உள்பட பணியாளா்கள் அனைத்தும் தமிழ்நாடு அரசு மருத்துவப் பணிகள் கழகம் சாா்பில் அளிக்கப்படும்.

இதனால், இலவச சிகிச்சை அளிப்பதில் எந்தவித குறைபாடும் ஏற்படாது என்றாா்.