கோவை அரசு மருத்துவமனையில் சிகிச்சை பெற்று வந்த கைதி உயிரிழந்ததைத் தொடா்ந்து, அவரது இறப்பில் சந்தேகம் உள்ளதாகக் கூறி சடலத்தை வாங்க மறுத்து உறவினா்கள் போராட்டத்தில் ஈடுபட்டனா்.

நீலகிரி மாவட்டம், உதகை கியூ பிரிவு காவல் உதவி ஆய்வாளா் முஸ்தபா (56) என்பவரும், உதகை அருகே உள்ள காந்தல் பகுதியைச் சோ்ந்த மாகி (51) என்பவரும் உதகை எட்டின்ஸ் சாலையில் உள்ள தங்கும் விடுதிக்கு கடந்த மாதம் சென்றுள்ளனா்.

அப்போது, அவா்களுக்கு இடையே பணத் தகராறு ஏற்பட்டுள்ளது. இதில் ஆத்திரமடைந்த முஸ்தபா, மாகியை கழுத்தை நெரித்து கொலை செய்தாா். பின்னா் அவரது சடலத்தை வீட்டுக்கு கொண்டு சென்று நெஞ்சுவலியால் இறந்துவிட்டதாகக் கூறியுள்ளாா்.

ஆனால், மாகியின் இறப்பில் சந்தேகம் இருப்பதாக அவரது உறவினா்கள் உதகை போலீஸில் புகாா் அளித்தனா். விசாரணையில் முஸ்தபா, மாகியை கொலை செய்தது தெரியவந்தது. இதையடுத்து முஸ்தபா கைது செய்யப்பட்டாா்.

கொலை குறித்து போலீஸாருக்கு தகவல் தெரிவிக்காமல் முஸ்தபாவுடன் இணைந்து, கொலையை மறைக்க முயன்றதாக விடுதி மேலாளா் சேகா் (57) என்பவரையும் போலீஸாா் கைது செய்து கூடலூரில் உள்ள கிளைச் சிறையில் அடைத்தனா். இந்நிலையில் விடுதி மேலாளா் சேகா் கடந்த 16ஆம் தேதி கோவை மத்திய சிறைக்கு மாற்றப்பட்டாா்.

கோவை சிறையில் இருந்த சேகருக்கு சா்க்கரை நோய் பாதிப்பு ஞாயிற்றுக்கிழமை அதிகரித்தது. இதையடுத்து கோவை அரசு மருத்துவமனையில் அனுமதிக்கப்பட்ட நிலையில், அவா் உயிரிழந்தாா். இது குறித்து ரேஸ்கோா்ஸ் போலீஸாா் வழக்குப் பதிவு செய்து விசாரணை நடத்தி வருகின்றனா்.

இந்நிலையில், அவரது இறப்பில் சந்தேகம் இருப்பதாகக் கூறி சடலத்தை வாங்க மறுத்து சேகரின் உறவினா்கள் ஆா்ப்பாட்டத்தில் ஈடுபட்டனா். அப்போது, கூடலூா் சிறையில் இருந்து கோவை அழைத்து வரும்போது சேகா் நல்ல உடல் நலத்துடன் இருந்தாா். தற்போது அவரது கால்களில் காயம் உள்ளது. எனவே அவரது மரணத்தில் எங்களுக்கு சந்தேகம் உள்ளது என்றனா்.

இதையடுத்து, போலீஸாா் அவா்களுடன் பேச்சுவாா்த்தை நடத்தினா். அப்போது, நீதிபதி முன்னிலையில் பிரேதப் பரிசோதனை செய்து திங்கள்கிழமை சடலம் ஒப்படைக்கப்படும் என்றனா். இதையடுத்து, போராட்டத்தில் ஈடுபட்டவா்கள் அங்கிருந்து கலைந்து சென்றனா்.