கனமழை: சோலையாறு அணையின் நீா்மட்டம் ஒரே நாளில் 15 அடி உயா்வு

கனமழை காரணமாக வால்பாறையில் உள்ள சோலையாறு அணையின் நீா்மட்டம் ஒரே நாளில் 15 அடி உயா்ந்துள்ளது.

கோவை மாவட்டத்தில், ஆழியாறு- பரம்பிக்குளம் நீா்பாசனத் திட்டத்தின் முக்கிய அணையான சோலையாறு அணை மூலம் சமவெளி பகுதியில் வசிக்கும் லட்சக்கணக்கான விவசாயிகள் பயன்பெற்று வருகின்றனா்.

மேலும், சோலையாறு மின் நிலையம் 1 மற்றும் 2 என இரண்டு மின் நிலையங்களில் மின் உற்பத்தியும் செய்யப்படுகிறது. 165 அடி உயரம் கொண்ட அணையின் நீா்மட்டம் கடந்த மாதம் 3 அடியாக இருந்தது. தற்போது பெய்து வரும் கனமழை காரணமாக அணைக்கு தொடா்ந்து நீா்வரத்து அதிகரித்து வருகிறது. 3 அடியாக இருந்த அணையின் நீா்மட்டம் கணிசமாக உயரத் துவங்கியது.

வியாழக்கிழமை காலை 6 மணியுடன் முடிவடைந்த 24 மணி நேரத்தில் அணைக்கு 5,408.33 கனஅடி நீா்வரத்து இருந்தது. அணையில் இருந்து 422.59 கனஅடி நீா் வெளியேற்றப்பட்டது. ஒரே நாளில் 15 அடி உயா்ந்து தற்போது அணையின் நீா்மட்டம் 80.30 அடியாக உள்ளது.